هى بقت كده يعنى؟!

[banota]

السلام عليكم ورحمه الله

مش هطول ولا حاجه انا بس عايزه حد يفسرلى موقف غريب


لما كنت ف الكليه بتاعتى الصبح كان جه وقت خروج مدارس وبما ان قريب مننا مدارس كتير اوى فبنشوف غرائب وحاجات تشيب بجد


الموقف بقى ودا موقف من ضمن كتير ..


فجاه وانا واقفه مع صحباتى نلاقى صوت حد بيصرخ جامد جدااااااااااااااااااا وطبعا صوت ولد وشكله اخره ابتدائى

وبجد منظره كان صعب عليا جداااااااااااااااااااا لانه كان بيتالم اوى والمفاجأه بقى ان ولد وراه وبرضو عيل ميتقالش عليه غير عيل


ومش متربى نهائى غير ف الشوارع ماسك عصايه شكلها صعب حتى تلاقوها تقيله عليه وضرب الولد دا ف ضهره ف وسط الشارع

الغريب انى توقعت الاقى ولد من الموجودين" اللى سنهم اكبر وطبعا بتوع الجامعه" يدافع او يتدخل بينهم دول مهما كانوا سنهم صغير

اللى صدمنى اوى وخوفنى انى ملقتش حد تدخل خااااالص غير بالصدفه رجل كبير مسك الولد اللى ضرب زميله

واخد العصايه وخلاه يرد الضربه ليه وطبعا بعدها قامت خناقه اكبر


المشكله والسؤال....


هل انعدم الامان والرجوله ف الشارع المصرى؟؟؟

كنا نعرف لو حد اتعرض لاى موقف هيلاى مليون حد يساعده ودا اتعلمناه ف الكتب

بس فى الواقع مش لاقياه

ولا ايه رايكم؟؟

[noorseen]

النااااااااس بتبعد عن الشر وتغنيلة

كل واحد يقولك انا مااااااالى خلينى فى حالى

الناس الدنيا لهياها

وكل واحد خايف على نفسة

وكل ما السنيين بتتقدم
بيبقى مفيش امان ولا رجولة
دة ممكن تلاقى واحد بتتسرق فى الشارع والرجالة قاعدين على القهاوى وفى المحلات بيتفرجوا من بعيد
ويقولولك يا عينى

ههههههههههه

الواضح ان مش بقى فى حد فاضى لحد

اما بقى لو اللى بيتسرق او بيضرب دة معروف هتلاقى مليون واحد بيقدم مسااااعدة
لكن حد مش معروف
هتقولى وانا مالى
خلينى جنب الحيط انا مش عايز اتبهدل

دة المنطق السائد حالا

ربنا يهدى الناس جميعا

لان بجد كل حاجة اتغيرت والمفاهيم اتغيرت

[واحدة من الناس]

اعترض ومع كامل احترامي طبعا علي الردود اللي قبلي

التعميم غلط غلط غلط

اذا كان فيه نمازج سلبية فا في قصادها مئات النمازج الايجابية

انا الحقيقة مش بنكر وجود السلبية بس اي مجتمع فيه اللي كدة واللي كدة

بس يمكن احنا هنا في مصر بنستنكرها قوي او بنحس انها شئ مخالف لطبيعتنا كمصريين اتربينا علي الشهامة والجدعنه
ومفهوم ابن وبنت البلد اللي صدقوني مراحش والله عند غالبية الناس
انا عن نفسي بيحصل قصاد عيني مواقف بجد بتهزي جدا داخليا من تأثري بالي بشوفه
من جدعنا وشهامة ومساعدة من غيرما نعرف بنساعد مين حتي
اخرها من كام اسبوع
الساعة 2 صباحا سمعت صوت صريخ وسمعت صوت ناس بتجري في الشارع
دخلت البلاكونة ابص لاقيت جنينة جنب بيتنا النار طالعة منها والدخان مالي المكان هناك منظر مرعب بجد
وببص تحت البيت لاقيت ناس والله والله معظمهم ما اعرفهم ولا كنت شوفتهم قبل كدة
جايين يجروا من بعيد واللي نازل بهدوم البيت واللي بعد ما يجي يرجع بسرعة بيته يجيب خرطوم ماية
وكام واحد واقفين بيتصلوا بموبايلاتهم بالمطافي اللي طبعا موصلتش الا لما الحريقة خلصت
انا جيت ابص للي واقفين لاقيت ان اصحاب الجنبنة 3 فقط ي وسط دوووول كلهم
والباقيين كلهم ناس اغراب او جيران نزلوا جري من بيتهم الشارع كان مليان بشكل مزهل
واول ما الحريقة اتطفت كله رجع تاني مكانه وكله روح ولاماكن مختلفة يعني جايين من اماكن كتير

ومفكروش ولا قالوا واحنا مالنا ولا احنا نص الليل ولا ملناش دعوة

وطفوا الحريقة ووقفت بجد مزهولة وفرحانة بالمنظر اللي عرفت به ان مصر والله بخير لسة يا جماعة
وغيره وغيره بنشوفه من حد يتخانق تلاقي اللي له واللي ملهوش بيخلص
ودة بشوفه بعيني
انا والدتي اللي يرحمها يوم وفاتها جالها الاسعاف تحت البيت
خرجت من البلاكونة ابص عليها لاقيت الشارع مليااااااااان ناس لمجرد انهم شافوا اسعاف قصاد بيتنا
ووصلت انهم طلعولنا البيت وبقوا واقفين يوسعوا المكام عشان تنزل والدكاترة معاها
ناس عمري ما كنت اعرفهم ولا اتخيل انهم يقفوا بالمنظر دة ساعتها
هقول ايه ولا ايه بس

والله والله والله
مافي زي مصر وناسها في اي مكان

والمشاعر الدافية قوي دي
مش هتلاقوها غير هنا

بعتذرعلي الاطالة
بس كانت كلمة حق ولازم اقولها في حق ناس مفيش منهم ولسة الخير جواهم والله

[bondok]

بصي يا بنوته .. هو الموقف مش محتاج تفسير،،
الا انه فعلا تغيير جزري فـ طبيعه الناس،،
وللأسف للأسوء،،

اكن برده انا مع تغريد.. ضد التعميم،،
يعني مثلا موقف او اتنين او عشره،،
مش هو الاساس .. احنا اساسنا الاحترام ونصر الضعيف بأي شيء،،

لكن نقول ايه .. يارب نرجه زي سابق عهدنا،،

[banota]

و الله ما بقى في امان في مصر ككل يا قمر

مش في الشوارع بس للاسف الامان انعدم من كل شبر في مصر

و الله مش عارفة اقولك ايه انا على المستوى الشخصي بقيت قاعدة في بيتنا

مش بخرج بقيت اخاف اخرج من اللي بيحصل في الشوارع و الخناقات و المشاكل

الواحد بقى يخاف على نفسه من انه حتى يخرج يقضي حاجة للبيت او يشتري حاجة

لان فعلا مبقاش في امان ان الواحد يآمن على نفسه و يخرج مبقاش في حد بيحمي حد

يعني متهيألي انها وصل بينا الحال ان لو واحد شاف واحدة حد بيحاول التحرش بيها او اعتراض

طريقها مش هيعمله حاجة لان الناس بقت تخاف على روحها انها تدهل نفسها في مشاكل

و كله بيقول يلا نفسي هو العمر بعزقة ؟؟

تسلمي يا قمر على التوبيك الجميل


نورنى وجودك يا جميل وبجد انا والله بقيت اخاف اخرج من البيت من اللى بشوفه

ربنا يسترها يارب

[banota]

وانا مالى خلينى فـ حالى



احنا منتحركش غير فى المصايب او عشان الحبايب

يعنى لو اللى بيتضرب ده اخو واحد بس من الجامعة

هتلاقى الجامعة كلها بتقف معاه وتقوم حريقة

انما معرفوش يبقى انا مالى خلينى ف حالى

حاجة بقيت صعبة بجد الوضع اللى بقينا فيه ده

عشان كده الواحد مبقاش يحب يدخل نفسه ف مشاكل

خصوصا لو لوحده او بعيد عن منطقته وبلده

لأنه عارف انه مش هيعرف يعمل حاجة وهيتبهدل

موضوع الواحد بعيد عن منطقته دا موجود من زمان كل واحد بعيد عن مكانه مش بيتكلم

واللى بشوفه ان مثلا لو سواق ماشى وفارد نفسه ع اللى ماشيين ع الطريق لازم

تكون متأكد انه موجود فى منطقته ومحدش يقدر يكلمه

وكتير اوى يقولك خير عايز حاجه بلدى وبتاع

وناسى ان كل منطقه فى البلد دى تخصنا كلنا




انا والله العظيم متهيألى لو جه احتلال ف البلد

ولا حد هيقدم نفسه عشان يحررها

كله هيقولك انا محترم معاهم ماحدش هيعمل حاجة

ويفضلو قاعدين كده


والله الجزئيه دى مخوفانى جدااااااااا وشاغله بالى من زمان وخايفه دا يكون حالنا

ربنا يستر


ربنا يعافينا ويشيل عنننا البلاوى دى

اسف للأطالة

تسلم ايدك


نورت التوبيك

[رزة]

يابنتى ده الموقف اللى انتى شوفتيه ده حاجة قليلة وبسيطة اوى على اللى انا شوفته

ده انا شوفت واحدة ست بتتخطف قدامى فى توتوك وسط عربيات كتير وسكة اصلا كانت واقفة وناس ماشية فى شارع عادى جدا والوقت مكنش متأخر

وست بتصرخ وان حد

من رجاله ينقذها او يسأل هى بتصرخ ليه ابدا محصلش بس شوفى سبحان الله ربنا بعتلها عربية شرطة معرفش والله جت منين و ازاى وامتى

[om marwan]

اغرب موقف قريته النهاردة الصبخ فى الجريدة
وهو طعن طالب ابتدائى لصاحبه فى فناء المدرسة
والغريب ان ادارة المدرسة اخفت بيانات الطالب
الزى طعن زميله برقبة ازازة فى بطنه ولم يتحرك احد
هذا فى مدرسة مش فى الشارع
اسلوب التعليم ومشاهدة الافلام الى بتحمل قصص ارهاب وقتل وعنف
السبب الرئيسى فى العنف الى بقى فى الشوارع وكل مكان
لازم الموضوع يتحل من الاساس
لو منعنا الاطفال من مشاهدة افلام العنف والجرائم والارهاب
اكيد هيأثر على سلوكهم وتربيتهم
انا ضد افلام العنف والجوائم بشدة لانها هى السبب
فى تعلم الاطفال والناس عامة الضرب والطعن والعنف
كنا زمان مش بنسمع عن الحجات دى خالص
دلوقت بقى شئ عادى فى كل مكان
وعلى فكرة العنف بقى موجود فى كل العالم مش مصر بس

[BECKHAM]

سلبية شعب ولكن مش كل الشعب وفى وقت كوارث بنلاقى الناس اوكيه بتتحد لكن فى خلافات شخصية بيطلع الشيطان بقى والناس بتقتل بعضها

عشان اتفه سبب منستغربش حياتنا بقت غير الاول فيه خلل كبير فى المجتمع .

تسلمى على لفت الانتباه

[banota]

شكرا لمروركم كلكم بجد نورتونى

بس حوار الحريقه اللى لفتت نظرنا ليه اختنا واحده من الناس

فدا طبيعى لانه موقف مش سهل

ولو كل واحد قعد وقال انا مالى الدنيا كلها هتكون كتله نار

انا بنفسى شفت حريقه وناس كانوا بينهم خلافات

ووقت الحريقه كله جرى وبيطفى


ياريت كلنا نتغير وكل واحد يبدا بنفسه