شُبيك لُبيك [الأرشيف] - منتديات ايجى ميزا

ملكه الاحزان

12-10-2010, 07:29 PM

لقيت الفانوس مرة ودعكته
طلعلى عفريت قاللى شبيك لبيك

قلت خلاص الذل أنا ودعته
ويا عفريت بالطلبات هاهريك

قالى هأوأو يا إنسان
دانا العفريت بن الجان

ما يهمنيش مكان وزمان
واطلب وعندى البرهان

قلتله عاوز قمح زُرع فى مصر
ومسؤولين يبطلوا فشر

وحكومة متعصرنيش عصر
ومرتب يسترنى لآخر الشهر

وعاوز عيش بدون طوابير
وحكومة ضد التبذير

وانتخابات من غير تزوير
ورئيس سابق أشوفه كتير

وعاوز فى بيتى كيلو دقيق
وسبب مقنع لأى حريق

ومجلس شعب بدون تصفيق
وفى كأس العالم لينا فريق

وعاوز أزور شرم الشيخ
وصباعين كفتة اللى فى السيخ

وأشرب مرة عصير بطيخ
وأخرج من القسم بدون تلطيخ

ونفسى الضحكة ترجع تانى
وحتة لحمة كندوز أو ضانى

وجنيه مصرى زى البرانى
ورصيف للمشى أنا وخلاّنى

رد العفريت عليا بغشم

وقال يا مصرى ماكنش العشم

بص.. أنا ممكن أنقلك الهرم

واسدلك الأوزون اللى اتخرم

وأرجعلك الأكل اللى اتهضم
وأعملك بقرة من الغنم

وأعملك قصر من العدم و
أقولك معنى شرم برم

بس طلباتك طلبات ملموس

عقله خلاص أكله السوس

ده تخطيط يا بنى ومدروس

إنك تعيش على طول موكوس

وأحنا بناخد منكوا دروس

إزاى نخلى العفريت متعوس

ويا رب ترجعنى تانى الفانوس

وزى بعضه أعيش محبوس

بدل ما أخرج واتبهدل زيك

وأعيش موكوس على متعوس

:SugarwareZ-084: :SugarwareZ-255: :SugarwareZ-223:

bondok

13-10-2010, 07:46 PM

لا جدع يا عفريت والله،،
العفريت فهم واحنا لسه مش عاوزين نفهم :d
تسلم ايديكي يا جنات،،

جمال المصري

13-10-2010, 09:55 PM

http://img163.imageshack.us/img163/6532/gemy.gif

حقيقي هو دة الواقع

ومفيش حاجه هتتغير حتي لو طلع الجن الازرق

مش هيعرف يغير اي شيئ

تسلم ايدك بجد علي كلماتك

واحدة من الناس

13-10-2010, 10:39 PM

الله الله
حلوة قووووووي
ههههههههههه

ملكه الاحزان

14-10-2010, 12:26 AM

ميرسى ع مروركم

بحر الحياه

07-02-2011, 10:53 PM

عفريت ذكى اوى ...

تسلم ايدك ياجى جى ... بجد جميلة جدا

♥ρėŧŧу ςαŧ♥

10-02-2011, 02:53 PM

ههههههههههههههههه
جميله اووى
تسلم ايدك يا قمر