المساعد الشخصي الرقمي

مشاهدة النسخة كاملة : إحنا مش آسفين يا صلاح



حنين حنونه
06-02-2011, 12:42 PM
الواحد مننا بقي بيسمع كمية كلام فتي و قص و لزق من غير تفكير بطريقة غير طبيعية و الناس بتصدق أي حاجة لدرجة إن واحد كتب علي الفيسبوك حاجة زي "عاجل أرجو النشر أصحاب المؤامرة الإيرانية الأمريكية الحماسية الإسرائيلية القطرية الإخوانية لتدمير مصر يدفعون مئات الدولارات للمتظاهرين في التحرير ويبعثون لهم رسائل مشفرة بالأطباق الطائرة ويتواصلون معهم بالتخاطر الذهني وتحضير الأرواح وكل متظاهر بياخد هابي ميل باللعبة وشقة في مدينتي !!" و في ناس صدقت فعلا


و أي حاجة دلوقتي يقولك العالم دي إخوان !! ,, يعني عمرو موسي , عمار الشريعي , عمرو واكد و البشرية دي كلها طلعوا إخوان , وتحس إن كلمة إخوان نفسها بقت شتيمة و أول ما تسمعها تتخيل ناس عايشة في العصر الجاهلي و مربية دقنها و فاتحين مصنع قنابل منزلية تحت السلم و بيفجروا نفسهم في أي حد !! ,, الإخوان همّا اللي سلطوا علينا البلطجية وهمّا اللي قاعدين في الميدان موقفين حال البلد و همّا اللي أكلوا الجبنة !!! ,, لو الناس الإخوان دول جامدين أوي كدة ياريتني كنت معاهم
,,
و بعدين حجة إن حال البلد واقف مبالغ فيها أوي يعني مش عارفين نستحمل شوية عشان نعيش عيشة أنظف ,, اعتبروها أجازة وضع بدون مرتب و أنتخوا شوية ,, يمكن الشباب دول يغيروا حال البلد للأحسن ,,, قالك الشباب اللي أنت بتقول عليهم دول عيال من بتوع الجامعة الأمريكية و الألمانية معاهم اجندات و هيخربوا البلد ؟؟ لا يا سيدي الفاضل ,, أنا روحت التحرير و شوفت الناس ,, شوفت جامعة أمريكية و جامعة عمالية و تعليم مجاني و من غير تعليم خالص ,, ولاد الناس و أولاد الشوارع ,, رجالة و ستات أطفال و عواجيز ,, فبلاش حد -يقول عليهم عيال سيس أو جهلة و فاضيين و مش لاقيين حاجة تشغل فراغهم - و هو قاعد تحت البطانية و بيتفرج من بيتهم علي التلفزيون


هيقولك كمان إن الموضوع فيه و لا مؤاخذة صوابع خارجية عشان كام واحد أجنبي و عربي عجبهم موقف الشباب المصري و ماشيين معانا في المظاهرات و بيهتفوا بإسم مصر ,,, إيه المشكلة يعني ,, ما جيفارا اللي انتم لازقين صورته في كل حتة كان أرجنتيني و مولع أمريكا اللاتينية كلها دفاعا عن الحرية ,, عملتوه بطل ليه و مقلتوش عليه عميل أبو صباع و صاحب أجندة و واخد كورس مظاهرات سلمية علي إيد الموساد لييه !؟!؟


قالك كمان المظاهرات حرام شرعا و لم ترد في السنة و اتقوا الفتنة يا إخواني و كلام في حرمة الخروج علي الحاكم ,,, يعني هو السكوت عن الحق هو اللي حلال ,, عموما القرضاوي رد في فتواه : من حق المسلمين – كغيرهم من سائر البشر- أن يسيروا المسيرات وينشئوا المظاهرات، تعبيرا عن مطالبهم المشروعة، وتبليغا بحاجاتهم إلى أولي الأمر، وصنّاع القرار، بصوت مسموع لا يمكن تجاهله. فإن صوت الفرد قد لا يسمع، ولكن صوت المجموع أقوى من أن يتجاهل، وكلما تكاثر المتظاهرون، وكان معهم شخصيات لها وزنها: كان صوتهم أكثر إسماعا وأشد تأثيرا. لأن إرادة الجماعة أقوى من إرادة الفرد، والمرء ضعيف بمفرده قوي بجماعته


علي العموم أنا لا إخوان ولا كفاية ولا 25 يناير و 6 إبريل ومش بأحب الأجندات ,, أنا واحد نفسه مصر تبقي أحسن و بيحاول يفكر ومش فاهم سياسة !؟



تعالوا نحط الأجندات علي جنب و ننسي الصوابع الأجنبية و التلفزيون المصري و قناة الجزيرة و الجو الرخيص ده ,, و نخلي الموضوع فليه كدة عشان ندرس الوضع برواقة ومن زوايا مختلفة


الحل الأول : إن العيال دي ترّوح بيتها بقي عشان نرجع الشغل و نقبض و في نفس الوقت ندّي فرصة للنظام إنه يصلح و خلال الـ 8 شهور يغير في الدستور و يحل مجلس الشعب و يمهد لفترة الإصلاح و الحريـ,,, مين قال إنه هيحل مجلس الشعب و هي إييه التغييرات اللي هيعملها في الدستور و لو هيحل مجلس فعلا هتلاقي نفسك وقعت في معضلة الدستور و الفرخة و البيضة و مين فيه اللي جه الأول مجلس الشعب و لا الدستور ؟!؟ ,, حط نفسك مكان واحد اضّرب و اتبهدل و قاعد في ميدان التحرير من 10 أيام هتلاقي إنك تستحق إجابة محددة أكتر خطاب عاطفي بيقولك فيه "إنه لم يكن ينتوي الترشح لفترة قادمة" عشان تلاقي كمية ناس عجيبة غيرت صورة البروفيل لصورة حسني و كاتبين ما تسيبناش يا بوب الناس و ملناش غيرك ,, علي كدة خطابين كمان من دول و ممكن يضطر آسفا إنه ينتوي و ينزل لرغبة الشعب و يرشح نفسه ,, و كلها تضحيات عشان الشعب !!؟!؟


الحل التاني : نشوف عيال الفيسبوك دول عايزين إييه ,, عايزين تشيلوا الرئيس ,, ماش يا حبيبي بس ساعتها المفروض رئيس مجلس الشعب يمسك وده أكيد مش هيعجب المعتصمين ,, طب نائب الرئيس يمسك ,, بس ده ساعتها مش هيقدر يعدل في الدستور أو يحل المجلس طبقا للدستور ,, بس فيه مادة بتقول إن الريس يقدر يحدد مهام النائب ,, يعني هينفع يخليه يغير في الدستور و لا مش هينفع ,, طب الريس يمشي و المجلس يمشي و الجيش يمسك ولا نـ ,,,, إييه اللخبطة دي ,, طب سؤال : هو الدستور ده كتاب سماوي منزل ولو حرّفنا فيه هنروح النار !!؟ ,, مش اللي حصل ده بيقولوا عليه ثورة و في ناس كتير ماتت ,, دم الناس دي مش ثمن كافي عشان نتغير للأحسن ؟!؟؟


سؤال أخير : هي الرئاسة دي حاجة حلوة وسيطرة ولا مسؤولية هتتحاسب عليها يوم القيامة

BECKHAM
06-02-2011, 01:06 PM
رايى الوحيد ومش هيتيغير

علي شباب 25 العودة للمنازل وترك فرصة لعجلة الاصلاح السياسى فى مصر تمشى

وبلاش مظاهرات واسبوع الصمود والكلام الاهبل ده كله .

البلد اتهزت هزة جامدة واى تغيير ميبقاش وقتى

شوفو تونس مش شالو الريس ولسه خراااابة عندهم اهم وبيتعاركو ع الرئاسة ...

زائر
06-02-2011, 01:17 PM
عند حق والله يا وليد
ومش عارف الرياسة فرحانين بيها لية
دة هيتحاسب عن كام مليون
خليهم يشيلوا بقى
شكرا ليكى يا حنين

حنين حنونه
06-02-2011, 01:23 PM
رايى الوحيد ومش هيتيغير



علي شباب 25 العودة للمنازل وترك فرصة لعجلة الاصلاح السياسى فى مصر تمشى


وبلاش مظاهرات واسبوع الصمود والكلام الاهبل ده كله .


البلد اتهزت هزة جامدة واى تغيير ميبقاش وقتى



شوفو تونس مش شالو الريس ولسه خراااابة عندهم اهم وبيتعاركو ع الرئاسة ...

لالالالالالالالالالالا يستر يارب احنا مش زاى تونس
الحمد الله
فى تغير ان شاء الله فى مصر تغير للحسن ان شاء الله
فى ناس كويسه جدااااااا فى الحكومه الجديده
وميرسى ع مرورك العطر ياا وليد

حنين حنونه
06-02-2011, 01:24 PM
عند حق والله يا وليد
ومش عارف الرياسة فرحانين بيها لية
دة هيتحاسب عن كام مليون
خليهم يشيلوا بقى
شكرا ليكى يا حنين

ميرسى ع مرورك يا علاء

bondok
06-02-2011, 07:22 PM
بصي يا حنين .. كلنا قولنا مليون برافو اللي حصل يوم 25 يناير،،
والثورة .. والانتفاضه .. والشهداء .. والتحرير ونواحيها .. يا الف بركه،،

ولكن .. طيب بعد كده ايه،،
دلوقتي حققنا اكتر من مطالبنا بكتير .. وحققنا نجاحات اكتر من المرجوه،،
دلوقتي شكلنا فـ ميدان التحرير .. غير شكل الثورة تماما .. ومطالبها .. لشكل غير حضاري بالمرة،،
والشباب اللي بنقول عليهم احسن شباب .. وهما امل مصر فـ اللي جاي،،
تبعيتهم للناس دي .. وانهم ماخدوش موقف كويس .. غير برده الشكل تماما .. وخلانا بنقول يارب يهديهم،،

انا متفق مع كل اللي بيقول انهم لازم يرجعوا .. وكتير قال ان التحرير موجود،،
لو الدنيا مش عاجباهم .. يبقي يرجعوا تاني .. مفيش اي مشكله،،

لكن بالشكل ده .. بصراحه يعني نوكومنت،،

حنين حنونه
07-02-2011, 12:19 AM
بصي يا حنين .. كلنا قولنا مليون برافو اللي حصل يوم 25 يناير،،
والثورة .. والانتفاضه .. والشهداء .. والتحرير ونواحيها .. يا الف بركه،،

ولكن .. طيب بعد كده ايه،،
دلوقتي حققنا اكتر من مطالبنا بكتير .. وحققنا نجاحات اكتر من المرجوه،،
دلوقتي شكلنا فـ ميدان التحرير .. غير شكل الثورة تماما .. ومطالبها .. لشكل غير حضاري بالمرة،،
والشباب اللي بنقول عليهم احسن شباب .. وهما امل مصر فـ اللي جاي،،
تبعيتهم للناس دي .. وانهم ماخدوش موقف كويس .. غير برده الشكل تماما .. وخلانا بنقول يارب يهديهم،،

انا متفق مع كل اللي بيقول انهم لازم يرجعوا .. وكتير قال ان التحرير موجود،،
لو الدنيا مش عاجباهم .. يبقي يرجعوا تاني .. مفيش اي مشكله،،

لكن بالشكل ده .. بصراحه يعني نوكومنت،،
طبعا نورتنى جدا يا بندق ع مرورك العطر