ياوطن وليه خايف
مين سرق
حلمى
من بين الجفن
والننى
وبدمى غسلنى
وكفنى
ومن خوفى
اكلنى وسكنى
انا مين
نفسى ياوطن
تطمنى
ياوطن سرقانى
سكينبك
ياريتنى جوايا
ماسكنتك
وعمرك فوق
الكتاف
قاعد ومتربع
عشانك تنهش
كلاب فيا
وتقطع
ياوطن وليه
خايف خطاويك
وقافل بيبانك
ومسنكر الشبابيك
ياوطن دمى
غطى دراعاتك
ليه ياوطن
بره حساباتك
طفش الحمام
ياوطن
والبرج عاد فاضى
ساكت سنين
ياوطن
عالظلم ليه راضى
ماتفوق وقوم
ياوطن
من دولة الماضى
ازاى تقيم محكمه
مافيهاش والا قاضى
والحلم فيك
ياوطن
يطلع كلام فاضى
وكفايه قوم
شعلقه
ف احبالك الدايبه
تحبسنا ليه
ياوطن
لما الكلاب سايبه
هاتعمل ايه ياوطن
فى مصيبتك النايبه
وازاى تقوم
ياوطن
والخلق فيك نايمه
