يا ليلة الرؤية يا محلاكي

**واحدة من الناس** · 30-07-2011, 05:19 AM

ياليـلة الرؤيــة يا محـلاكي

يا جايبة الخير وياكي

من امتي انا قاعدة استناكي

وبحلم بلحظة رؤياكي

الراديو اعلن جيتك

وكلنا في حضرتك

نستني نتيجة رؤيتك

وقلوبنا تتعلق بهلتك

بكرة ولا بعده..ايه الاخبار
نتسحر الليلادي ولا بكرة فطار

يا ناس طموني ..دة العقل طار

من اللهفة والشوق لشهر الانوار

يارب قدرني علي الانتظار

للهلال طالعة الانظار

وللسما متعلقة كل الابصار

وكفوف ممدودة بتدعي الستار

يهل علينا الشهر ونكون من الابرار

يارب سهلها والمفتي يقول كلمته

ويهل للمؤمن شهر عبادته وتقوته

الكل قاعد منتظريسمع خطبته

هيبقي بكرة ؟؟ ...ولا لشعبان خاتمته

ادينا قاعدين نستني جايته

يارب فرحنا واسعدنا الليلة بهلته

يارب فرحنا الليلادي

وانا انزل اجيب الزبادي

والم العيال وانادي

واجيب سوسن واصحي شادي

قول يا مفتي بقي..

ياااااه ..يا طول الساعة دي..!!!

هيقول اهو

هيقول اهو

هيقول

هيقول

هيــ......

هاااااااااااااااااااااااااااااااااااااااااااا

افرح يا محمود ارقص يا عباس

غنوا وهيصوا وهنوا كل الناس

المفتي قالها وفرحنا واطمنا خلاص

رمضان بكرة يا اخوانا

زغرتي يا ام اخلاص