صراع اليأس والأمل ...

**Mr Muslem** · 11-10-2011, 07:01 AM

الموضوع زى قصه هتتقال فى ابيات
صراع بين اليأس والأمل لشخص واحد ...
تعالى اسمعني يا مسكين
تعالى بس رايح فين
وإيه جابك هنا الليلة
تعالى دي سكة الهالكين
حرام التوهة تندهلك وتسمعها
وتجري عليها بايع دنيتك والدين
تعاى بلاش بلاش متروحش
دا بحر التوهة مبيرحمش
تعالى بلاش بلاش هاتّوه
هاتوه ... ؟!
أنا ....
تايه من الأوِّل
هاتوه أكتر؟
مفيش أكتر
ومش ممكن هتتمرر
حياتي مُرّها مكرر
ومهما خسرت مش هخسر
أكتر من الصفر اللي مالي دنيتي ومادد
جذوره جوّا جوّا الروح
عليك عمرك وروحك والضمير هانو
وقبل الكل ضاعت فطرتك ضلّيت
حسبت الحسبة و الخسران
جعلتو ف كفتك ورضيت
تكون هامش على الهامش
تعيش ميّت تموت عايش
لا متّ ولا انت بردو حيييت
أنا ...... ميّت
فمتهددش
منيش هسمع فمتكملش
حدودي هيّا حد القبر
وبطّلتو خلاص الصبر
دوام النوم وخدْر الغيبة والتوهان
قتل همّي
وداب ألمي
نسيت الحلم والفكرة
نسيت بُكره مفيش بُكره
لاعدت بحب ولا بَكْرَه
تقول توهة تقول سَكْرَه
خلاص أنا ضعت
ضعت خلاص
وضيعت المنى بإخلاص
فارقني و رُوح
بعيد وخلاص
طب اسمعني
دقيقة وبس
وجاوب لو دا كان يرضيك
لنفسك بس
لمست ف يوم خدود وردة
وطاب اللمس ؟
وعندك عين تشوف الشمس ؟
وقلبك دقّتو تملّي
بتمس الحقيقه مسّ
وروحك فيها عين بتشوف
وتحس الجمال.
.
بتحسّ ؟
أنا اتعودت
أشوف الشمس متغطّية بالضلمة
واشوف الوردة دبلانة علي ..... عودها
وأرض بلادي مبتطرحش غير الشوك
نزفت آمالي على شوكها
ومبتشبعش
ومهما الجرح كان غاير
وعقلي من الألم طاير
تقوللي مهما تتألم
متتوجعش
وفين الصحبة فين الحب ؟
وفين صبرك وفين جَلَدَك
وفين أملك ف وجه الرّب ؟
مبعنا الحب ف الدكاكين
عرضنا الصبر ف الفتارين
وكداب اللي يقدر يوم
يقول ان احنا بني آدميين
يقول الشعرا إوعاك م الحياة تيأس
وأقول الشعر يا اخوانّا
مكانو بس ف الدواوين
خلاص اسكت !
تعبت معاك على الآخر
ومش قادر
أرمم فيك أمل مطحون
عبث وجنون
وعلقم ظنك الكدّاب
عليه روحك بتتغذى
بتتغافل عن المغزى
بتتغابى
بتتجاهل
ومبتسمعش غير موّالك الباطل
لأن انتا بتعشق موت
حياة الموت
لأنك عارف ان الحيّ
مش بيعيشها بالساهل
خلاص همشي ...... أنا الليلة
وراجع تاني يا ...... قدري
خسرت الجولة دي الليلة
وليل قلبك هزم فجري
مكنتش هقدر استنى
لحد ماشوفك الليلة
بتعزف يأسك المشؤوم على ..... وتري
خلاص همشي ..... ومش بهرب
لأنّي
مش يؤوس زيّك
أنا ...... عكسك
وصورة أصيلة من نفسك
وهرجعلك
وهنشوف يا " أنا " التاني
مين فينا هيبقى " انت "