انهارده صحيت من النوم على صوت تنفيض مبالغ فيه جدا
خير يا جماعه فى ايه , قالولى آنهاردة ضيوف
انا اعرف انهارده السبت انهارده الأحد الوقفه عيد الأم
لاكن انهارده ضيوف ده مش فاهم تركيبته ايه ..!
ولما كلنا هنتعب ونشتغل كده . ليه مخدناش آجازه ..؟
يعنى انا اروح لمديرى ف الشغل الصبح اقولو صباح الخير يا فندم
بعد اذن حضرتك انا انهارده اجازه , يقولى ليه انشاء الله
اقولو كل سنه وانت طيب انهارده ضيوف
يقولى اجازه نص يوم
لا لا لا يا افندم دول من البلد
يقولى أجازه تلت ايام , الله يكون فى عونك يا أبنى
انهارده ضيوف ده لما باصحى فيه الصبح
اغسل وشك , مهو انا اكيد باغسل وشى
اغسل سنانك انهارده ضيوف
حاضر , بس انا باغسل سنانى سواء ضيوف ولا مش ضيوف
رتب اوضتك نظم الجزامه لمع سريرك رتب دولابك
مانا فهمت كل ده من رتب اوضتك الى ف الأول
انهارده ضيوف يوم عبقرى لسبب :
زمان وانا صغير كنت بانزل تحت , مليش دعوه باى حاجه
غير انى العب قريب من البيت عشان لو عازو حاجه
بس كان فى طلب غريب شويه ان فى اصرار رهيـــــــــــب وبركز على رهيب , انى لازم اليف ظهرى
هما الضيوف مالهم ومال حاجه زى كده ..؟
يعنى انا لو جيتلك البيت هقولك ليفت ظهرك ..؟ والله امشى
مينفعشى
لما كبرت شويه اكتشفت ان الى بيحصل فوق , صعب جدا جدا
فى جنود صاعقه فى البيت , ماسكين عصيان ولابسين خوذ
وفى ناس بتتشعلق وناس متعلقه فى نجف وبيخبطو فى حجات
ولما دققت شويه لقيتهم اسرتى
طيب انا مالى ومال الكلام ده
وفى حاجه مهمه جدا جدا . لازم نفتح صابونه جديده بريحه
طب ما الصابونه كبيرة وحلوه وبريحه
لاكن لاء , الضيوف يقولو علينا ايه
هيقولو علينا ايه يعنى ..؟
يلا ياللى صابونيتكم كبيره وبريحه وحلوه وزى الفل .؟
حاجه غريبه اوى
سيب ده كله وتعالى بقى ع الضيوف الى جيبنالهم , صابونه كبيره وحلوه وجديده وبريحه
لو كلو سمك , بيمسكو الصابونه على طول قبل ما يغسلو اديهم
هتلاقى الصابونه اتحولت كأنها فى حجر معسل كان بيغسل ايده هنا
التعارف
التعارف بيبدأ قبل وصول الضيوف بحوالى تلت اربع ساعات
من خلال , ادب ادب ادب ادب ادب ادب واستأذن قبل ما تتكلم
ومحدش بيقولنا مين الى جاى اصلا
يعنى هو مين الى جاى ..؟ تقعد انت تفكر بقى
ويتخيلك ان فى شامبانزى جاى انت صغير مش عارف حاجه
ايه الى انا هقعد مؤدب اوى كده
يا اما بقى الضيف ده جاى ومعاه كرباج
فتقعد محترم
التعارف بقى الحقيقى بيبدأ من لحظه دخول الضيوف
عمو قبل ما بيسأل على أى حاجه , بيسأل على طفايه
طنط : بتدخل صوتها عالى , ولابسه تيير لونه احمر فاقع
وكل كلامها اخره , يا حبيبتى
حتى لو بتتكلم فى حاله وفاه تقولك والله ماتت يا حبيبتى
معاهم طفل صغير كده : اول ما بيدخل من باب الشقه
كأن فهد هرب من القفص , جرى بالجزمه ع الملايات
ويفتح الحنفيات ويطلع بالجزمه ف كل حته
وبيعمل بيبى ف الحوض
الولد ده من جريه ومهارته كأنه عاوز يكسر رقم قياسى عمله عند ناس قبلنا
فكنت بتخيل ان بباه هيطلع ستوب وتشر ويقولو هاه هاه
بالمناسبه الولد ده دايما اسمه عماد
ليه اخت صغيره : بتدخل كرهانا اوى , يااااااااااااااااااساااااااااااااااتر
ودايما مامتها كل لما تاخد بق من العصير تبوصلها وتقولى
ايه يا دعاء دى طنط
طنط ملهاش دعوه بأى حاجه .
لاكن عمو الضيف ده , كان بيحسسنا بأهميه وكان من كتير كلام طنط
انها لما كانت عند طنط فلانه ايه الى حصل ولما كانت عند طنط فلانه ايه الى حصل طنط علانه ايه الى حصل طنط ترتانه ايه الى حصل
لدرجه انى قربت احس انهم بيشتغلو ضيوف
عماد الى هو العسل الصغير ده , لما بيجو يعرفونا على بعض
احنا بقى اطفال عاوزين يعرفونا على بعض عشان ندخل نلعب جوه ف الأوضه الى هيطلع فيها
بالجزمه ع المليات
ايد تشاور نحيتى : يحيى الكبير شاطر جدا ف العربى وبيحب التمثيل
محمد الصغير شاطر جدا فى الرياضه وبيحب الرسم
هو الى راسم صورة جدو دى
عمـــاد عســل
ف اللحظه دى بنسمع صوت كسر حاجه ورا لسه ماعرفناش هى ايه
وعماد بيجرى طياره زى ابو تريكه فى الصاله وبيحضن بباه
بس ارجوكم متفهموش موقف عمو غلط
لان عمو كان بيزعقلو جدا لما بيكسر الطفايه
عشان عمو بيقرف لما يطفى ف الشاى , اصل عمو تنك
طنط ملهاش دعوه باى حاجه خالص هى بترغى وصوتها عالى زى ما قلتلكم
لحد ما تيجى لحظه حاسمه ,
لو عماد مقطعشى سلك التليفون الأرضى يعملو كرباج
لازم يرد ع التليفون , ودايما يقول ايه ..!
مين معايا .
وهو انت تعرفنى اصلا يا غتت عشان تسأل مين بيتصل
من كتر كلامهم عن زيارتهم وعن الى بيعملوه فينا بجد اتأكد ان الناس دى بتشتغل ضيوف
وان عمو ده هو المدير بتاعهم
وان عماد بيتمرن بجد عشان يطلع زى بباه
ضيف تقيــــل
ف نفس الوقت وهما ماشين
كنت ببصلهم وانا متأكد
ان الناس دى رايحين عند حد تانى
الى اللقاء فى زياره تانيه
مواقع النشر انشر موضوعك وهاتلو زوار