الفضايح هتبقى بجلاجل ....

**Don't play with me** · 22-05-2011, 11:28 AM

قال النبى - صلى الله عليه وسلم - إنى لأعلم أقواماً يأتون يوم القيامة بحسنات أمثال جبال تهامة بيضاً"

جبال تهامة البِيض ضرب بيها المثل فى العلو والإرتفاع والكبر
ناس هتيجى يوم القيامة بحسنات كأمثال الجبال

يجعلها الله هباءً منثوراً

قام ثوبان ،قعد على ركبه ، يا رسول الله ، يجعلها الله هباءً مثوراً؟
قال نعم
قال صفهم لنا يا رسول الله ، جِلِّهم لنا لعلنا نكون منهم
يارب سلم يارب

قال أما إنهم منكم ومن جلدتكم ويتكلمون بلسانكم ويأخذون من الليل كما تأخذون ولكنهم أقوام إذا خلوا بمحارم الله انتهكوها

ادام الناس - ما شاء الله - زى الفل
ولكن بمجرد ما الأودة بتتقفل والناس فى البيت بتنام
ويضغط على الزرار

أول حاجة يعملها

موقع إباحى

إذا خلا بمحارم الله انتهكها

لو واحد صاحبه قاعد جمبه ميقدرش يعمل كده
ده ييجى يوم القيامة بسبب موقع إباحى بسبب صورة بسبب لذة دنيوية عاجلة
يأتى يوم القيامة يبص
يلاقى الحسنات كلها طارت .. ضاعت

ليه؟

لانه

بسبب لذه دنيوية عاجلة انتهك محارم الله تبارك وتعالى

2

قبل ما تخش على موقع إباحى

افتكر الحديث ده

والكلمة دى

اللى بيخش على المواقع الإباحية هيُحشر مع دول يوم القيامة

أقسم بالله إنى اللى بيخشعلى المواقع الإباحية سيُحشر معهم يوم القيامة

عارفين ليه؟

لأنه بيحبهم

بيحب الكفار ، الزناة ، اللى بيجهروا بالمعصية
اللى بيتجرؤا على حدود الله

بيحبهم

وطالما هو بيحبهم

النبى بيقول المرء مع مين؟

...

وهو بيحيهم بيعشقهم

بالليل قبل ما ينام
مواقع إباحية
الصبح أول ما يقوم
مواقع إباحية
وبين المرتين
دخول على مواقع إباحية

إذا اتكلم
ده انا شفت امبارح حتة فيلم

ده أنا شفت امبارح حتة لقطة

ده أنا شفت امبارح حتة صورة

ده أنا ده أنا

حبتهم؟

اُحشر معاهم يوم القيامة .. على طول .. مع هؤلاء

مع الكفار؟
اه
مع الزناه؟
اه
ما انت بتحبهم

بس أنا ممحبهمش

طب انت مدمن النظر لهم ليه؟
مدمن الحديث عنهم ليه؟
ليه بتدعوا لهذه المواقع مع أصحابك؟

ده كله دليل إن انت بتحبهم

لو فتحنا قلبك دلوقتى هنلاقى مكتوب موقع إباحى.كوم

اللى احنا سمناه هلاك.كوم

يبقى انت بتحبهم
وطالما بتحبهم
تُحشر معهم يوم القيامة

قبل ما تدخل على موقع إباحى اضرب الموقع ده
بايه؟
بالجبل رقم 3

ايه الجبل رقم 3؟

إنك تقف بين يدى الله - عز وجل - يوم القيامة

عبدى
اقرأ كتابك
خت الكتاب

مائة ألف زنية

ايه ده؟

مائة ألف زنية؟
والله عمرى ما زنيت يارب

أصل أنت شفت المعصية وأقرتها

يارب والله أنا مزنتش

أنا اه دخلت على موقع إباحى

بس أنا مزنتش

اه
بس انت يا حبيبى لما شفتها وأقرتها وأقريت الفاحشة دى
ولم تنكرها اتحطت فى ميزان سيئاتك

صلوا على المصطفى

قال - صلى الله عليه وسلم - :"إذا عُملت الخطيئة كان من غاب عنها ورضيها كمن وقع فيها"

تانى والله

والله تركز تانى

قال - صلى الله عليه وسلم - إذا عُملت الخطيئة كان من غاب عنها- هم هناك بيزنواويصوروا وأنا غايب عن الفاحشة دى والعياذ بالله ، ده أنا موقعتش فيها أصلا ولكن أنا رضيتها بدليل انى دخلت أشوفها بمجرد ما انت رضيتها ، على طول ايه اللى يحصل؟ ورضيها كان كمن وقع فيها

تاخد وزر اللى بيعصى ده

وخد بالك

يا ريتها والله يا إخوانى
أقسم بالله

يا ريتها تكون على أد الزنا بس

تخيل الولد اللى زنا ده
وصور ناس وهو بيزنى ونشرها على النت
كام ألف شاب شافها وضل؟
كام ألف بنت شافتها وضلت؟

وبسبب الصور دى ، ولد راح زنا وبنت راحت عملت كذا وولد راح عمل كذا
يبقى الولد ده نشر معصية ، وعشرات الآلاف من الشباب قلدوه

تخيل ان انت تيجى يوم القيامة تبص فى ميزان سيئاتك

ايه ده؟
ده لا يمكن؟
كل ده؟

مائة ألف سيئة؟
أنا شفت مائة ألف صورة جنسية

يبقى إذن مائة ألف زنية
وكل ولد ارتكب معصية بسبب هذه الصورة بتكون فى ميزانك يوم القيامة

مين فينا يتحمل كده أصلا؟
مين فينا انه يقف بين يدى الله - عز وجل - وكل يوم بيتفرج يشوفله 20 - 30 - 40 ألف صورة
فى اليوم مثلا

ييجى يوم القيامة يلاقى عشرات الآلاف ومئات الآلاف ،، زنا زنا زنا زنا زنا زنا

يارب أنا عايش كل ده ؟

اه
انت غبت عنهم
بس انت اقرتها

وطالما انت اقرتها

خلاص

هيُكتب لك من الوزر كمثل الذى فعلها

كمثل الذى فعلها

احذروا أحبابى

دول تلات جبال
الجبل الأول
حسناتك هتروح
الجبل التانى
هتُحشر معاهم
الجبل التالت
كتابة الزنا فى صحيفة الأعمال

4

سيئة جارية

احنا مش عندنا حسنة جارية؟
الموقع الإباحية سيئة جارية.

خبر لسه أخ من إخوانكم باعتهولى
بيقول

ان صاحب أشهر المواقع الإباحية العربية
تاب إلى الله - عز وجل-

عارفين ايه السر من وراء توبته؟

انه صاحبه اللى كان بيعمل معاه المنتديات الإباحية والأفلام الإباحية وكان بينشرها على موقع النت ..

مات

و للأسف

كل المواقع الإباحية اللى عملها محدش يقدر يقفلها
لان اللى يقفلها لا بد يكون معاه كلمة سر

وكلمة السر ادفنت مع صاحبها يوم ما مات
أم الولد ده

راحت لصاحبه

بتقوله يا بنى
انا ابنى كان بيعمل ايه؟
يا ابنى انا ابنى كان بيعمل ايه؟
يا ابنى وأنا نايمة أنا شفت ابنى مدفون فى قبر
وعشرات الآلاف من الشباب بيتبولوا على هذا القبر

يا ابنى أنا اينى كان بيعمل ايه؟

الشباب دول بيتبولوا على قبره ليه؟

الرؤية دى معايا على طول بالليل والنهار

يا ابنى ، ابنى كان بيعمل ايه؟

وده بيقول الكلمات بتطلع من أمه عاملة زى السكاكين اللى بتدبح فيا

مات واحنا مش قادرين نعمل حاجة

ده مات ودخل قبره ولسه السيئات شغالة

لسه السيئات شغالة

مبتوقفش

كنت للأسف فى يوم من الأيام عرَّفت واحد صاحبى على موقع إباحى
وصاحبى ده عرف صاحبه على موقع إباحى
وصاحبى ده عرف صاحبه على موقع إباحى

وبدأ المواقع الإباحية تنتشر بسببى
يبقى كل ده

فى ميزان سيئاتى يوم القيامة

فدى سيئة جارية

زى ما احنا عندنا حسنة جارية

أصحاب المواقع الإباحية عندهم سيئة جارية

الجبل رقم 5

المواقع الإباحية سبب .. لسوء الخاتمة والعياذ بالله

سبب لسوء الخاتمة والعياذ بالله

لأن من عاش على شىء مات عليه ومن مات على شىء بُعث عليه

أحد الدعاه
أم من الأمهات اتصلت عليه قالتله الحقنى أبوس ايدك تعالالى بسرعة
انتى ايه يا حاجة فيه ايه يا حاجة

لازم يا بنى تجيلى دلوقتى
راحلها الداعية دوه ودخل عليها
فقالها ايه يا أمى ايه مشكلتك؟

دخل قالتله بص
ابنها عارى تماما على السرير بتاعه قدامة شاشة النت عليها موقع إباحى والولد بيموت وهو بيشوف موقع إباحى

والولد عارى تماما .. خيُبعث يوم القيامة على هذا الأمر
لان حكمة ربنا اقتضت ان اللى يعيش على شىء يموت عليه

واللى يموت على شىء يُبعث يوم القيامة عليه

6
من خطر المواقع الإباحية

هلاك القلب

ضاع قلبك

هان عليك؟

القلب اللى كان بيتمتع بقراءة القرآن
اللى كان بيخشع فى قيام الليل
القلب اللى كان بيتمتع فى الصلاة ويخشع فى الصلاة

هان عليك تضيع ده عشان موقع إباحى؟

وبعد كده تيجى تشكو وتقول أنا مش عارف ليه معدش حاسس بطعم القرآن

مش عارف ليه معدش بحس ان انا بخشع فى الصلاة

أعمل ايه؟اسوى ايه؟
انت ضيعت متعتك

انت ضيعت متعتك الحقيقية

لما استعجلت المتعة فى الحرام

مات القلب

انتكس القلب

وانتكاس القلب

ده أول خطوة من انتكاس الإنسان

هو كويس
ولكن شايف نفسه لما بيخلو بمحارم الله بينتهكها
بيبدأ ينتكس داخليا

والانتكاس يفضل يعلو و يعلو

لحد ما ينتكس ظاهريا وباطنيا بسبب المواقع الإباحية

المواقع الإباحية

سبب - والعياذ بالله - لهلاك الوقت

اللى انت هتُسئل عنه يوم القيامة بين يدى الله - عز وجل -

هتُسئل عن شبابك قضيته فى ايه

هتسئل عن حياتك قضتها فى ايه؟

فهتعمل ايه بين يدى الله - عز وجل - لما تجد ان ربنا لما يسألك يوم القيامة عن أوقاتك كيف قضيتها

فتقول يا رب أنا قضتها فى مواقع إباحية

هتقول لربنا ايه؟

هتقول لربنا ايه ساعتها؟

وهيكون موقفك ايه ادام النبى - صلى الله عليه وسلم -

أحبابى احنا مشكلتنا

ان احنا اذا كنا احنا آخر الأمم

فاحنا أول الأمم هنُحاسب

ومعنى كده أحبابى

معنى كده

الفضايح هتبقى بجلاجل,,,,,,,,

نقلا بتصرف عن فضيلة الشيخ : أحمد جلال

**كنزى** · 27-08-2011, 08:45 AM

الله يحفظ شباب مصر و شباب المسلمين ويهديهم اللى الطريق السليم
وشكرا رمضان لطرحك القيم المفيد
ربى يحفظك

**BECKHAM** · 27-08-2011, 10:30 AM

اللهم احفظنا من كل شر وتب علينا من كل ذنب واغفر لنا

واهدنا واهدى شباب الامة الاسلامية للخير يارب انت مولانا فانصرنا على شهوات انفسنا وذلاتنا يا الله

**♥ρėŧŧу ςαŧ♥** · 27-08-2011, 07:11 PM

اميييييييييييييييين يارب
تسلم ايدك يا رمضان
موضوع بجد قيم
ربنا يجازيك عليه كل خير يارب

الموضوع: الفضايح هتبقى بجلاجل ....

أدوات الموضوع