نفس السيناريو

**bedo_story** · 29-05-2011, 01:24 AM

نفس السيناريو بيتعاد تانى
ما انا اصلى فاهم ما انا
كنت بردوه حبيبها الاولانى
بس سابتنى وراحت لحبيب تانى
راحت لواحد تانى خد مكانى

شوفته و شوفتها
بصلتى بس والله ما بصيتلها
واقف هو بدرى عن ميعاده
وخارجة هى واصحابها
عشان تلحق ترميله نظرة
وتحلى ليه كل اوقاته

نفس السيناريو كان بيحصل معايا
كنت مكانه وكان ده بيحصل من البداية
بس يظهر كده ان مش دى الحكاية

نفس النظرات بتقول كلام كتير
شوفتها وشافتنى بصلتى
بس والله ما بصيت ليها
رمت كلمة وضحكت هى
وفاكرة انها بكتنى
وانا ماشى فى حالى
لا سمعت اللى اتقالى
ولا اهتميت بيها
بس زعلت عليها
مش منها ولا اللى جمبيها

رجعت من تانى
و كنت ماشى فى طريقى وحدانى
لقيت بردوه نفس السيناريو
بيتعاد من تانى
ما انا قولت بقى
ما انا كنت حبيبها الاولانى

لقيتها واقفة ليه
مستنية يعدى وتسلم عليه
نفس اللى كان بيحلص معايا
بيتعاد تانى
وهى دى الحكاية
والسيناريو كتبه ليكم
ووصلت خلاص للنهاية
وبحمد ربنا
انه حط لحبنا
من زمان نهاية

قصيدة
( نفس السيناريو ) ( قصة حقيقة )
كتابة
عبدالله سيد عبدالله

**واحدة من الناس** · 29-05-2011, 05:36 AM

جميلة يا عبد الله حقيقي

وهو دة حال الحياة
مفيهاش شئ دايم لحد

تسلم ايدك

**BECKHAM** · 29-05-2011, 12:02 PM

السلام عليكم

ازيك يابيدو عامل ايه يارب تكون بخير

بص هو بصراحة انا شايف فيه مشكلة فى السرد وفى الجرس الموسيقى للقصيدة مختل شوية عايزة تضبيط وشغل عليها الفكرة كويسة .

انا حاولت على قد مقدر كده اكتب مثلا بداية معتمد على جزء من كلامك

بس مغير فى القافية

______________________

نفس السيناريو بيتكتب من جديد

وسنينى معاها كانت زى ايام العيد

كنت حبيبها الاول كنت فاكر انى الوحيد

لكن سابتنى وراحت لحبيب جديد

نفس السيناريو بيتكتب من جديد

_______________________________

دى مجرد محاولة كده بس ده اللى انا شايفه واتمنى تتقبل رايى الشخصى .

تحياتى ليك

**bedo_story** · 29-05-2011, 05:11 PM

المشاركة الأصلية كتبت بواسطة beckham

السلام عليكم

ازيك يابيدو عامل ايه يارب تكون بخير

بص هو بصراحة انا شايف فيه مشكلة فى السرد وفى الجرس الموسيقى للقصيدة مختل شوية عايزة تضبيط وشغل عليها الفكرة كويسة .

انا حاولت على قد مقدر كده اكتب مثلا بداية معتمد على جزء من كلامك

بس مغير فى القافية

______________________

نفس السيناريو بيتكتب من جديد

وسنينى معاها كانت زى ايام العيد

كنت حبيبها الاول كنت فاكر انى الوحيد

لكن سابتنى وراحت لحبيب جديد

نفس السيناريو بيتكتب من جديد

_______________________________

دى مجرد محاولة كده بس ده اللى انا شايفه واتمنى تتقبل رايى الشخصى .

تحياتى ليك

و عليكم السلام و رحمة الله و بركاته

الحمد لله تمام اتمنى انت كمان تكون بخير

على فكرة لازم اسمع اراء كل الناس واتقبل ارائهم سواء بالسلب او الايجاب

بس انا عاوز اوضح ليك حاجة احنا هنا ( قسم الخواطر العامية )

دى انا كتبتها من غير ما اظبط فيها اى حاجة مقصدتش اظهرها باحسن صورة

لانها عن موقف حصل معايا امبارح وكان قدام عينى فا حبيت اعبر عنه فا سيبت نفسى

للورقة والفلم وكل كلمة طالعة من جوايا ومن اللى انا شوفته

عشان كده مردتش اجملها او زى ما انت قولت اضيف ليه جرس موسيقى و كده

فا خليت فيها حاجة اسمها تنوع فى الافكار كل بيت مربوط بقافية معينة ونهاية معينة

و فى نفس الوقت حققت مبدء وحدة الاسلوب و ووصلت فكرتى اللى عاوز الناس تعرفها وتفهمها وتحسها

شكرا لنقدك وكلامك الجميل واتمنى متكنش اول تجربة شرفتنى ونورتنى