مرحبا بك فى منتديات ايجى ميزا هل هذه اول زيارة ؟!
صفحة 1 من 3 1 2 3 الأخيرةالأخيرة
النتائج 1 إلى 10 من 26
  1. #1
    الصورة الرمزية ♥ρėŧŧу ςαŧ♥
    تاريخ التسجيل
    Oct 2010
    الدولة
    مدينة المستحيل
    المشاركات
    25,770
    معدل تقييم المستوى
    10

    يوميات انا مش ورقه ،،، منقول

    السلام عليكم ورحمه الله وبركاته

    قصة المسلسل ده عجبتنى
    وان شاء الله هنقلهالكوا على حلقات


    احنا هنعيش قصه مع ابطالها محمد وعبد الرحمن سنة اولي طب بالمناسبة هما كانوا اصحاب منذ الصغر
    ممكن تكون القصة طويلة او قصيرة بس ان شاء الله هنستفيد منها
    المهم ندخل في احداث قصتنا


    الحلقة الاولي
    يصحي محمد اول يوم ليه في الكليه ايه ده الساعه 10 طبعا محمد صاحي مفزوع اول محاضرة
    راحت عليه ....
    ينادي محمد علي والدته
    ماما ماما انت مصحتنيش ليه ينفع كده من اول يوم مفيش التزام
    والدته تدخل انا قعدت اصحي فيك من الساعة7 وكالعادة صحيني بعد 5 دقايق لا لابعد ربع ساعة لحد ماوصلنا الساعة 8 وانت نايم في سابع نومه وانا زهقت منك
    ازاي ده انا محستش بأي حاجه خالص انا زعلان اوي

    وهنا يدخل والد محمد زعلان اوي ياحبيبي لك حق تزعل والايبقي ماعندكش دم
    محمد:مش كده برده يابابا قول لماما اصلها مش مقدرة
    الوالد: مش مقدره لا مالهاش حق اتصدق بالله انت ماعندكش دم
    محمد: ليه كده بس انا مالي ماما هي اللي ماصحتنيش بذمه
    الوالد: ياسلام ياخوي انا مابكلمش علي كده انت زعلان اوي لما فاتتك اول محاضرة
    طب ماانت ضيعت صلاة الفجر انهارده مازعلتش اوي كده ليه وللاانت خلاص بعد امتحانات الثانويه العامه مش هشوفك تاني في الجامع
    محمد: في سره انا فاتتني محاضرة الكليه بس الحمد لله ربنا عوضني خيرا منها محاضرة ابويا
    ده بدل مايقولولي تفطر ايه ياحبيبي نروح نحضره ماعلينا
    الوالد: انت سكت ليه نمت
    محمد:لالا ابدا خلاص سماح المرة دي انا هجهز بقي قبل مايفوتني باقي المحاضرات

    وهنا يرن موبايل محمد الظاهر صاحبه عبد الرحمن بيطمن عليه
    محمد:ايوه ياعبده ازيك عامل ايه
    عبد الرحمن: الحمد لله رب العالمين انت فين
    محمد :انا علي السرير اصلي راحت عليه نومه
    عبد الرحمن: ولا يهمك تتعوض المهم انا مستنيك ماتتاخرش يلا
    محمد : ماشي مسافه السكه ويجهز محمد وينزل عشان يقابل عبد الرحمن

    محمد: كل دي زحمه انا هركب ازاي وبعد عناء طويل محمد يركب الميكروباص وينطلق الي الكليه
    ويفاجا محمد بواحده تيجي تقعد جنبه......
    وبعد فتره تساله هو حضرتك في كليه ايه
    محمد: نعم طبعا هو سامع بس مستغرب السؤال
    تعيد البنت السؤال مرة تانيه
    محمد: ليه حضرتك فيه حاجه
    البنت :لا ابدا بس زي مانت عارف ان النهارده اول يوم في العام الدراسي وانا مااعرفش اي حاجه في الجامعه فبسال حضرتك ممكن نكون في نفس الكليه فتعرفني عليها وكده يعني
    محمد: يفكر فترة طويله ياتري اقولها ايه دلوقتي اروح معاها كليتها واخدمها واعمل فيهامعروف طب وعبد الرحمن اعمل فيه ايه .....

    ولكن فجاه يفتكر محمد قصة سيدنا موسي عليه السلام مع المرأتين وكيف كان حياءوه وادبه معهم وكذلك حياء المرأتين
    محمد : بصوت حازم هو حضرتك في كليه ايه
    البنت : في تجاره
    محمد : خير انا مش في تجاره ومعرفش حاجه عنها وكأنه يقول لها اسكتي واياكي تتكلمي تاني
    وبعد عناء ينزل محمد من الميكروباص واخيرا هيقابل عبد الرحمن
    ياتري ايه اللي هيحصل بينهم؟

    هذا ماسنعرفه في الحلقه القادمه ان شاء الله


    التعديل الأخير تم بواسطة ♥ρėŧŧу ςαŧ♥ ; 03-09-2011 الساعة 09:13 PM

  2. #2
    الصورة الرمزية ♥ρėŧŧу ςαŧ♥
    تاريخ التسجيل
    Oct 2010
    الدولة
    مدينة المستحيل
    المشاركات
    25,770
    معدل تقييم المستوى
    10

    افتراضي رد: انا مش ورقه ..... منقول

    انتظرونى فى الحلقه الثانيه
    باذن الله

  3. #3

    افتراضي رد: انا مش ورقه ..... منقول

    تسلمى يا لولا
    منتظره باقى القصه
    تسلم ايديكى

  4. #4
    الصورة الرمزية ♥ρėŧŧу ςαŧ♥
    تاريخ التسجيل
    Oct 2010
    الدولة
    مدينة المستحيل
    المشاركات
    25,770
    معدل تقييم المستوى
    10

    رد: انا مش ورقه ..... منقول



    الحلقة الثانية


    محمد يدخل الكلية يدور علي عبد الرحمن وبعد لف كتير في الكلية ايه ده ده شبه عبد الرحمن خالص
    لا لا بس اكيد مش هو ايه المقشة اللي في وشه دي هههههههههههههه وللا البنطلون شكل الترزي ضحك عليه وخد باقي القماش وقعد يفحصه من فوق لتحت لا ده اكيد مش عبد الرحمن ولو عبد الرحمن امتي وازاي وليه حصله كده ويقطع تفكير محمد صوت عبد الرحمن

    عبد الرحمن:ايه يامحمد هو انا كنت بايت معاك امبارح وللا ايه ده بدل ما تخدني بالحضن قاعد تبصلي من فوق لتحت

    محمد :
    لا ابدا ياعبده وياخده بالحضن وحشتني اوي انا معرفتكش يابني انت ايه اللي حصلك 3 شهور اجازة يحصلك كل ده ايه اللي حصلك؟!!!!

    عبد الرحمن :
    بعدين احكيلك المهم انت ازاي تفوت اول محاضره من اولها كده طب حتي خليك ملتزم اول يوم

    محمد:
    صحيح عملتوا ايه من غيري

    عبد الرحمن:
    طبعا الدكتور كان زعلان جدا انك محضرتش وكان عايز يلغي المحاضرة لولا ان العدد كان كبير

    محمد:
    انت بتتريق!!!!

    عبد الرحمن:
    ما انت اللي سؤالك غريب هنعمل ايه يعني من غيرك لا انت الكمبيوتر ولا البروجيكتور ولا حتي الميكروفون عشان المحاضرة تتعطل من غيرك

    محمد:
    ماشي ياعبده بكره تعرف اهميتي

    عبد الرحمن:
    المهم انت ازاي راحت عليك نومه والفرق بين جلسة الشروق والمحاضرة قليل يعني ماتلحقش تنام فيه

    محمد:
    مش اما اكون الاول صليت الفجر ابقي اقعد جلسة الشروق

    عبد الرحمن:
    يعني انت ضيعت صلاة الفجر انهارده ازاي؟!!!

    محمد:
    يلا ابدأ المحاضرة التانيه كلي اذان صاغيه امال يابني لو مكناش دفنينه سوا

    عبد الرحمن:
    دفنا مين

    محمد:
    ايه يابني احنا مش كنا بنصلي ايام الامتحانات وبعد كده بقي انت عارف انا بحب النوم اد ايه
    اوعي تقولي ان انت لسه بتصلي الفجر

    عبد الرحمن:
    انا بفضل الله بصلي كل الصلوات في المسجد

    محمد:
    بجد عليا انا برده الكلام ده

    عبد الرحمن:
    المهم دلوقتي يامحمد انا هرن عليك كل صلاة عشان اذكرك بيها وبالذات صلاة الفجر بس اياك تفتح عليه انا بقولك اهو والا هخليك تشحنلي

    محمد:
    بالراحه بس عليا احنا اول يوم في الدراسه

    عبد الرحمن:
    ما هو عشان كده لازم نفتح صفحه جديده مع ربنا احنا فرطنا كتير اوي يامحمد

    محمد:
    في سره فرطنا في ايه انا مش فاهم اي حاجه

    عبد الرحمن:
    هنبتدي من النهارده
    اول حاجه لازم تعرفها اهميه صلاة الفجر
    انا لو اديتك صندوق فيه طوب وصندوق فيه دهب وقلتلك وصلهم مكان معين ياتري اهتمامك بالاتنين هيكون نفس الاهتمام

    محمد:
    لا طبعا دا حتي لو صندوق الطوب ضاع بسيطه هشتري صندوق والطوب اهو كتير في الشارع لكن صندوق الدهب لو ضاع هعوضه ازاي

    عبد الرحمن :
    الحمد لله اتفقنا بص بقي صلاة الفجر اغلي من كنوز الدنيا يعني لو ضاعت مش هتعرف تعوضها
    1-قال رسول الله صلي الله عليه وسلم
    ( من صلى الصبح في جماعة فكأنما صلى الليل كله ) رواه مسلم .
    2 قال رسول الله صلى الله عليه وسلم
    ( من صلى الفجر فهو في ذمة الله (حفظه) فلا يطلبنكم الله بشئ من ذمته ) حديث صحيح
    رواه الطبراني ومسلم بلفظ مشابه .
    3-قال رسول الله صلي الله عليه وسلم
    ( بشر المشائين في الظلم إلى المساجد بالنورالتام يوم القيامه ) صحيح .
    كده اتفقنا ان صلاة الفجر مهمة ماشي

    محمد:
    ماشي ياسيدي كمل باقي المحاضره اما اشوف اخرتها معاك

    عبد الرحمن:
    بص بقي انت قبل ما تنام لازم تكون متوضي وتقول اذكار النوم بكره ان شاء الله هجيبلك كتاب حصن المسلم
    وتكون مخلص انك عايز تقوم بجد تصلي ولازم تكون عارف ان صلاه الفجر دي ترمومتر علي صدقك شوف بئي انت صادق وللا .....
    خلاص اتفقنا يامحمد هرن عليك وهستناك تكنسل

    محمد:
    خلاص خلصت المحاضرة يلا بقي قولي ايه اللي غيرك كده

    عبد الرحمن :
    هوا نا ههرب منك ما احنا مع بعض اهو يا بني ان شاء الله هحكيلك تعالي بس نروح الجامع لان الضهر قرب يأدن وبعد الصلاه ان شاء الله هحكيلك
    وفي الجامع عبد الرحمن يقوم يصلي السنة

    عبد الرحمن:
    انت مش هتصلي السنة

    محمد:
    دا كويس اني بصلي الفرض يابني

    عبد الرحمن :
    ماشي ياسيدي بس الرسول صلي الله عليه وسلم بيقول من صلي اثنا عشر ركعه في اليوم والليله بني الله له بيتا في الجنه

    محمد :
    ماشي ماشي صلي انت بس وخليني اقعدلي شويه بقي عشان تحكيلي بين الادان والاقامه

    محمد :
    يراقب عبد الرحمن وهو بيصلي ايه دا الواد اتغير 180 درجه هو ايه اللي حصله ماكنش بيتكلم كده ابدا الواد اتجنن وللا ايه انا خايف عليه لاحول ولاقوه الا بالله ايه ده وكمان بئي بيصلي كويس ماشاء الله ايه الخشوع والسكينه دي هو مستني نتيجه امتحان تاني وللا ايه
    ياتري ايه اللي حصله 3شهور يتقلب القلبه دي

    انتظرونى فى الحلقه القادمه باذن الله
    اشوفكم على خير


  5. #5
    جدع واخد وضعه الصورة الرمزية واحدة من الناس
    تاريخ التسجيل
    Oct 2010
    الدولة
    مصر _ دمياط
    المشاركات
    758
    معدل تقييم المستوى
    14

    افتراضي رد: يوميات انا مش ورقه ،،، منقول

    منوراني يا حبيبتي

    وتمـ التثبيتــ

    مع تمنياتي باقبال كبير انـ شاء الله علي موضوعك الطيبــ






    اللــهمــ بلـــغنـا رمضـــــــــــــــان

    من مواضيع واحدة من الناس :


  6. #6
    الصورة الرمزية ♥ρėŧŧу ςαŧ♥
    تاريخ التسجيل
    Oct 2010
    الدولة
    مدينة المستحيل
    المشاركات
    25,770
    معدل تقييم المستوى
    10

    افتراضي رد: انا مش ورقه ..... منقول

    اقتباس المشاركة الأصلية كتبت بواسطة rwana مشاهدة المشاركة
    تسلمى يا لولا
    منتظره باقى القصه
    تسلم ايديكى
    ان شاء الله يا رونى
    تسلميلى
    وتابعى معايا وقوليلى رأيك
    نورتى يا حبيبى

  7. #7
    الصورة الرمزية ♥ρėŧŧу ςαŧ♥
    تاريخ التسجيل
    Oct 2010
    الدولة
    مدينة المستحيل
    المشاركات
    25,770
    معدل تقييم المستوى
    10

    افتراضي رد: يوميات انا مش ورقه ،،، منقول

    اقتباس المشاركة الأصلية كتبت بواسطة واحدة من الناس مشاهدة المشاركة
    منوراني يا حبيبتي

    وتمـ التثبيتــ

    مع تمنياتي باقبال كبير انـ شاء الله علي موضوعك الطيبــ

    ان شاء الله يا توتا
    وميرسى على التثبيت يا حبيبتى

  8. #8
    الصورة الرمزية ♥ρėŧŧу ςαŧ♥
    تاريخ التسجيل
    Oct 2010
    الدولة
    مدينة المستحيل
    المشاركات
    25,770
    معدل تقييم المستوى
    10

    رد: يوميات انا مش ورقه ،،، منقول



    الحلقة الثالثة

    ينتهي محمد وعبد الرحمن من صلاة الضهر

    محمد: يلا بئي احكيلي

    عبدالرحمن:
    ياعم اصبر حتي استني لما نختم الصلاة ونخرج من الجامع هحكيلك واحنا مروحين


    محمد:
    ماشي انا صبرت عليك كتير


    عبدالرحمن:
    معلش استحملني

    ويخرج محمد وعبدالرحمن من الجامع ويعيشوا ازمه المواصلات
    يركب محمد وعبد الرحمن اخيرا

    محمد :
    يهزر مع عبد الرحمن مابلاش بخل يااخي وهات عربيتك معاك وارحمنا من الزحمه دي


    عبد الرحمن :
    ماشي ماشي


    محمد:
    يلا كلي اذان صاغيه


    عبدالرحمن:
    بص ياسيدي انت عارف طبعا محمود ابن خالتي انا وهو ومجموعه من اصحابنا نوينا بعد الثانويه العامه وقرفها اننا نسافر بعيد ونصيف بئي ونعيش حياتنا

    وبالفعل سافرنا وقضينا ايام حلوه فسح بئي وسهر واغاني وافلام وملاهي كانت ايام حلوه

    محمد:
    ايه ده وانا ليه ماقولتليش


    عبد الرحمن:
    ماتقطعنيش يامحمد

    المهم واحنا راجعين كان السواق مشغل اغنيه انا واصحابي كنا بنحبها اوي وكنا قاعدين نصقف
    لقينا واحد مانعرفوش بيدي للسواق شريط ويقوله لوسمحت من فضلك خد شغل ده احسن
    طبعا كلنا اعترضنا وقولنا للسواق المهم الشخص ده قعد يتكلم واحنا ودن من طين والتانيه من عجين كلامه طبعا زي قلته انا تقريبا ماسمعتش كلمه منه
    وفجاه الاتوبيس كان هيعمل حادثه بس ربنا ستر
    وكأن دي كانت رساله من ربنا لينا بس احنا اللي مبنفهمش

    محمد:
    يااااااسلام وده بقي اللي غيرك هو انت بقيت حساس اوي كده هههههههههههههههه


    عبدالرحمن:
    شكلي مش هكملك الحكايه


    محمد: صحيح انا نسيت أسالك ع البت سها اللي كانت معانا في درس الكيميا البت دي اللي انت كنت بتحبها صحيح هي دخلت معانا طب

    عبدالرحمن:
    يارب صبرني اديك قعدت تقاطعني لحد ما محطتي جت انا هنزل واكملك بكره


    محمد: بس استني طب تعالي اتغدي عندي وكملي القصه ماما عامله فراخ هديك فرخه بحالها بس تعالي

    عبدالرحمن:
    جزاك الله خيرا المهم انا نسيت اقولك ابقي ظبط المنبه عشان صلاة الفجر وانا برده هرن عليك


    محمد:
    طب يلا انزل قبل مالسواق يرميك من الشباك

    ويودع عبد الرحمن صاحبه محمد
    و
    محمد: يفضل قاعد وينزل المحطه اللي بعده اما نشوف اخرتها مع الواد عبده دي ايه

    ويدخل محمد البيت: ماما انا جعان اوي يلا فين الفراخ

    والد محمد:
    يابني اصبر شويه احكيلي عملت ايه انهارده في الكليه


    محمد: دا انا عملت عمايل تخيل يابابا الواد عبدالرحمن بيصلي وقال ايه هيرن عليه كل صلاه عشان يذكرني بيها وانا قال ايه اكنسل عليه واقوم اصلي

    والد محمد:
    وايه الغريب في كده عقبالك يابني ربنا يهديك

    وبعد اما ينتهوا من الغدا

    محمد:
    صحيح انا هدخل انام واسيب الموبايل واما الواد عبد الرحمن يرن العصر والمغرب والعشا والفجر تكنسلوا عليه وتقوموا تصلوا

    ها مين هياخد الموبايل وللا بابا ياخده عصر ومغرب وماما تاخده عشا وفجر

    والد محمد:
    وسيادتك هتعمل ايه هتنام من دلوقتي لحد تاني يوم الكليه


    محمد: الله اعلم انا تعبت اوي انهارده

    ويدخل محمد ينام ويسيب الموبايل
    ياتري عبد الرحمن هيعمل ايه بكره مع محمد

    ده اللى هنعرفه الحلقه الجايه باذن الله
    انتظرونى


  9. #9
    عضوية تولبار اجدع صحاب الصورة الرمزية حامل المسك
    تاريخ التسجيل
    Oct 2010
    الدولة
    فى بتنا
    المشاركات
    179
    معدل تقييم المستوى
    14

    افتراضي رد: يوميات انا مش ورقه ،،، منقول

    ما كملى بقيت القصة
    احنا هنفضل فى انتظار كده على طول



    من مواضيع حامل المسك :


    • #10
      الصورة الرمزية ♥ρėŧŧу ςαŧ♥
      تاريخ التسجيل
      Oct 2010
      الدولة
      مدينة المستحيل
      المشاركات
      25,770
      معدل تقييم المستوى
      10

      افتراضي رد: يوميات انا مش ورقه ،،، منقول

      اقتباس المشاركة الأصلية كتبت بواسطة حامل المسك مشاهدة المشاركة
      ما كملى بقيت القصة
      احنا هنفضل فى انتظار كده على طول
      انا كاتبه من الاول ان ده مسلسل
      مش قصه هتنزل مره واحده
      هتكون حلقه بحلقه
      لو مش بتحب الانتظار
      هى 30 حلقه
      ممكن تيجى كمان اسبوعين اكون خلصتها
      وتقرأها مره واحده
      ميرسى لمرورك



     
    صفحة 1 من 3 1 2 3 الأخيرةالأخيرة

    معلومات الموضوع

    الأعضاء الذين يشاهدون هذا الموضوع

    الذين يشاهدون الموضوع الآن: 1 (0 من الأعضاء و 1 زائر)

    الكلمات الدلالية لهذا الموضوع

    مواقع النشر انشر موضوعك وهاتلو زوار

    مواقع النشر انشر موضوعك وهاتلو زوار

    ضوابط المشاركة

    • لا تستطيع إضافة مواضيع جديدة
    • لا تستطيع الرد على المواضيع
    • لا تستطيع إرفاق ملفات
    • لا تستطيع تعديل مشاركاتك
    •  
    RSS RSS 2.0 XML MAP HTML
    DMCA.com Protection Status جميع الحقوق ل رياض حسونة