بتاكلوا دقيق ولا بتشربوا زيت ؟؟؟!!!

**ريـتـاج** · 17-09-2011, 11:49 PM

دخلت الام على بنتها لقيتها بتعيط

سألتها : مالك؟

كانت البنت حزينة لآخر مدى

,وردت قالت لأمها: النهاردة اسوأ يوم في حياتي

أكيد مفيش حد في الدنيا دي تعيس قدي!!

أمها سألتها: طيب إيه اللي حصل؟

البنت ردت: أنا خسرت المسابقة اللي كنت داخلاها

وضاع تعب السنة كلها في لحظات

وأقرب صاحبة ليا خانت العِشرة وأساءت ليا

حتى شريف الطفل الصغير اللي كنت بزوره دايماً في دار الأيتام اللي جنبنا

عرفت إنهم حجزوه في المستشفى وهاياخد علاج كيماوي

مش عارفة ليه بيحصل كده؟

أنا ماعملتش حاجة في حياتي أستاهل عليها كده؟

بيقولوا الأم الشاطرة بتعرف إزاى ترسم الإبتسامة على شفايف ولادها

الأم كانت عارفة قد إيه بنتها دي بتحب أوي التورتة اللي هى بتعملها

فقالت لبنتها.. تحبي أعملك تورتة مـ اللي بتحبيها؟

البنت قالت لها طبعاً

الأم جابت الحاجات اللي بيتعمل منها التورتة

وقالت لبنتها: تشربي شوية زيت؟

البنت استغربت اوي وقالت لها: ماما انتي بتهزري!!

شوية وامها قالت لها: طيب كُلي شوية الدقيق الأبيض ده!

البنت برّقت أوي وقالت لها: في إيه يا أمي هو ده يتاكل؟

راحت الأم قايلة لها: طيب شوية الفانيليا علي البيض ده تقدري تشربيهم؟

البنت قالت لها: أمي اكيد هيحصل حاجة في معدتي و طعمهم أكيد وِحش!

هنا أمها قالت لها..

كل الحاجات اللي إنتي رفضتيها و(بتكرهيها) دي

لما تتحط على بعض ونزيد عليها نار كمان بتبقى في الآخر التورتة اللي إنتي (بتحبيها!)ـ

كتير اوي لما تواجهنا اي مشكلة او حاجة صعبة

نبقى مدايقين جدا وناقمين على الدنيا

وبمرور الوقت نكتشف ان اللى حصلنا ده كان هو سبب حاجة اجمل في المستقبل مكناش نتخيلها

... سبحان الله ...

كل شيء بيحصل لحكمة من عند ربنا

حتى لوكان في بدايته صعب

بس علينا بالصبر وبالثقة في الله والايمان بقضاءه وحكمته