لعبة حظ دي ولا بلدنا

[Mr Muslem]

لعبة حظ دي واللا بلدنا

حدّ يجاوب طب يا سيادنا

مين حزّرها ومين فزّرها

مين يكسبها ومين يخسرها

رمية زهر وفين الزهر

يمكن نصبح من شطارها

يمكن نكسب وآدي المكسب

لما لعبنا

كسبنا مرارها !



طبخة دي يمكن واللا بلدنا

حدّ يجاوب طب يا سيادنا

مين هنا عارف سر الوصفة

حدّ يشاور ع اللي وصفها

حدّ يدلنا على أوصافها

بعد الطبخ اتغير لونها

ومعدناش قادرين نعرفها

مين سوّاها ومين قشرها

مين جهزها ومين حضّرها

مين هياكلها ومين هصيوم

ولا هينوبه حتى بصلها !



بيعة دي والا دي هيا بلدنا

حدّ يجاوب طب يا سيادنا

سعرها كام والبايع مين ؟

وهتتباع بالبني آدميين ؟

إنما بيقولوا ان الناس

ف الأعراف متحرم بيعها

لكن تجارها الشطار

باعوا البيعة وضمن البيعة

دفعوا قصاد غضّ الأنظار !



تركة دي أصلا واللا بلدنا

حدّ يجاوب طب يا سيادنا

مين أصلا ف الأصل مَلَكها

علشان للأنجال يتركها

ولو التركة دي كات شرعية

فين هوّا دليل الملكية

إنما عين الجهل حقيقي

تسأل ع الحق الحرامية !



سجن دا واللا دي هيا بلدنا

خد يجاوب طب ياسيادنا

إيه هوّا المطلوب علشان

أبقي مواطن صالح فيها

إيه التهمة عشان أنفيها

واللا وجودي أصلا تهمة

غمّ وغمة

ومشاكل بتجر مشاكل

وعشان كسر الشر ف نفسي

يلزمني التقييد بسلاسل !

واللا خياري التاني يا سادة

أبقى ضلالي واكون سجَّانها

أبقى حرامي يقولوا حاميها

إنما وف كل الأحوال

عمري ما هبقى مواطن صالح

أبدا فيها

طول ما بتكتر يوم عن يوم

أقفال زنازنها !



جثة دي واللا دي مصر بلدنا

حدّ يجاوب طب يا سيادنا

ليه ساكته ومبتتحركش

نصرخ ف ودانها متسمعش

ونضيع قدّامها متدمعش

قول يا طبيبها

قول واعلنها

مصرنا ماتت

واللا دي بس برفة موتها !

[SeCяeT GίrŁ]

كـلـمـاتـ حـلـوة اووى اوووى ..
يـسـلـموا الايـادى

[Mr Muslem]

يسلم قلبك يا جميل


يسلمو أنتي لمرورك الى نور التوبيك ....

دومتى بود ...

[كنزى]

عمري ما هبقى مواطن صالح

أبدا فيها

طول ما بتكتر يوم عن يوم

أقفال زنازنها !

والله عندك حق
شكرا كتير ليك احمد

[Mr Muslem]

الشكر لله يا كنزي

يسلمو لمرورك الجميل الى نور التوبيك أختي دومتي بود ...

[♥ρėŧŧу ςαŧ♥]

جميله اوى
تسلم ايدك يا احمد

[Mr Muslem]

يسلم قلبك يا بيتي

منورة التوبيك ... ويارب علطول منورة المنتدى كله بتواجدك الدايم

دومتي بود أختي