صينية كنافة روعه من مطبخى بالصور

[FayRouZ]

ازيكم يا جماعه اخباركوا ايه

كل سنه وانتوا طيبين

وربنا يعود عليكم الايام بخير جميعا يارب

ــــــــــ

امبارح عملت صينيه كنافة جميله اوى ونالت اعجاب الجميع الحمدلله

وقلت لازم اخواتى هنا يشوفوها ويقولوا رأيهم بدون مجاملات

ملحوظة :-

انا عملتها مختلفه عن الجاهزة شوية .. ومعلش الصور مش واضحة اوى

ـــــــــــــــــ

نبدأ بأسم الله :_

اول حاجة عملت المهلبيه بالمقادير دى

1.5 كوب لبن - 2 معلقه كبيرة نشا

وحطيتها على النار وقعدت اقلبها من اول ما حطيها

لحد ما تتخن زى الكريمة وشيلتها من النار

وبقت بالشكل دة

تانى حاجة عملت السمنه بالمقادير دى

1 معلقه كبيرة سمن بلدى - 1 معلقه كبيرة روابى

وحطيتها على النار لحد ما ساحت و قفلت النار فورا وشيلتها

بقت بالشكل دة

تالت حاجة بقى عملت الشربات بالمقادير دى

نص كيس سكر - معلقه صغيرة ملح ليمون - 1 كبايه ماية - نص معلقه صغيرة فانيليا

ملحوظة :-

" انا عامله الشربات بكميه كبيرة لانى بشيله فى التلاجة لمره تانيه "

وحطيته على النار وقعدت اقلب على طول لحد ما السكر يدوب

واول ما غلى وطيت النار وسيبته لحد ما يستوى ويتقل شوية صغيرين مش اوى

بقى شكله كدا





بعدها بقى جبت طبق غويط وحطيت فيه

تلات اربع كيلو كنافة

لانى عملت صينيه كبيرة

وقعدت افك الكنافه من بعضها

ومقطعتهاش قوى عشان تبقى مختلفه عن الجاهزة





جبت بقى الكنافة وحطيت عليها السمنه اللى سيحناها على النار

بس مش كل السمنه نسيب شوية صغيرين على جنب

وقعدت ادعك الكنافه بالسمنه لحد ما السمنه توصل لكل الكنافه

هتبقى بالشكل ده





بعدها جبت الصينيه اللى هنعملها ودهنتها بالسمنه البلدى كويس

وفرشت فيها نص الكنافه اللى عملناها وفردتها بايدي كويس لحد ما بقت متساوية

بالشكل دة






وبعدها جبت المهلبيه اللى عملناها وفردتها على الكنافه كويس

ملحوظه :-

" انا مش فردت المهلبية لطرف الكنافه لانى باكل الطرف بس وبحبة فاضى مليش فى المهلبيه "

وبعدين رشيت عليها فول سودانى وجوز و زبيب

وبقت بالشكل ده





بعدها روحت جبت باقى الكنافه وحطيتها فى الصنيه وفردتها كويس اوى

وجبت باقى السمنه اللى حطيناها على جنب

ورشيتها على الكنافه من فوق وجبت حتت سمنه مش سايحة

و وزعتها على الصينيه وهتسيح فى الفرن متقلقوش

بقت بالشكل ده




نكون فى اثناء تحضير الصينيه ولعنا الفرن يسخن

وندخل بقى الصينيه فى الفرن على نار هادية ونقفل عليها

لحد ما نشوفها اتحمرت من الطرف بتاعها

نطفى النار من تحت و نولع الفرن من فوق بس لحد ما تتحمر






لما تخرج هيكون الشربات برد نوزع عليها الشربات بس مش كله طبعا

لانى زى ما قلتلكوا عامله كميه كبيرة شربات بزيادة اوى يعنى

حاجات خفيفه كدا تتوزع على كل الصينيه

بس معلش بقى الصينية اتلسعت منى فى النار من النص شوية

بس خير خير الحمدلله

هتبقى كدا

ورشيت عليها جوز وممكن لو تحبوا مكسرات

وقطعتها وهيا فى الصينيه مجرد تقسيم كدا بس

ولما تبرد خالص بقى تتقدم






ودى صوره من قريب



ودة طبق بقى لحماتى حبيبتى




يارب تعجبكم بقى

وعايزة الاراء بمنتهى الصراحة

[♥ρėŧŧу ςαŧ♥]

يا فيروز ايه الجمال ده
ما شاء الله تسلم ايديكى
انتى ناويه تعقديلى وليد
هههههههههههههههههههه
هو مش ناقص
بس اوعدكوا
البيتزا هعملها واصورها بس لما افضى ان شاء الله
تسلم ايدك يا حبى

[rwana]

تسلم ايديكى يا حبيبتى
شكلها جميل قوى

[BECKHAM]

اللهم انى صائم

جمدة جدا يا فيروز تسلم ايدك وتصويرك وكله تمام بجد والله بتتعبى كتيرر

ربنا يسعدك يارب ديما كده

وبقولك طلب بعيد عن الحلويات ( معلش عايز طريقة للسبانخ كده تكون حلوة اوك )

وتسلمى يارب ومتاكليش تغريد عشان تيجى المنتدى تاخد من هنا