هنجيب كمية المكرونة اللي احنا هنعملها

ونجهز حلتين فيهم مية مغلية

ونحط المكرونة في الحلة الاولي لمدة 5 او 7 دقايق



ومنخليش المكرونة تكمل سوا في المية دي

الفكرة هنا ان احنا بنتخلص من كمية كبيرة من النشويات اللي في المكرونة

عشان تبقي صحية اكتر

المهم هنصفيها من المية بتاعتها

بعدين هنحطها في الحلة التانية وهنضيف للمية رشة ملح وشوية زيت زيتون بسيط



ونسيبها لحد ما تتسلق كويس ونصفيها من المية ونشطفها بمية باردة من الحنفية

ونسيبها علي جنب لحد ما نجهز الصلصة

هنجيب فصين توم مع معلقة زيت ونشوحهم



يدوب لما ريحة الثوم تظهر ويتغير لونه



هنضيف شوية فلفل اخضر متقطعين قطع صغيرة

بيدي نكهة وطعم جميل اوي للصلصة



ونسيبهم يتحمروا بسيط اوي ونجهز الصلصة بتاعتنا انا عملتها بصلصة معلبة

بحب طعمها اكتر من الطماطم الفريش وكل واحدة حسب رغبتها

جبت معلقتين صلصة ودوبتهم في شوية ميه

وضفتهم للثوم والفلفل وحطيت عليها ملح وفلفل اسمر وزعتر وشطة



ممكن تضيفي اي توابل وبهارات تانية حسب ما تحبي

المهم سيبت الصلصة تتسبك وهتبقي بالشكل دة



بعدين هنضيفها للمكرونة



طعمها كان رائع وخفيفة جدا جربوها متاكدة انها هتعجبكوا

وطبعا مش شرط تعملي الصلصة زي دي اي طريقة انت متعودة عليها اوك

بس اهم حاجة تستخدمي زيت زيتون عشان تبقي خفيفة وصحية

كدة خلصنا اول طبق

تابعوني يا قمرات

نكمل يا قمرات

هنيجي بقي للبطاطس المقلية معشوقة الجماهير

هتجيبي الكمية اللي انت عايزاها من البطاطس

تغسليها وتقشريها وتقطعيها صوابع طخينة شوية

وتغسليها كويس اوي دة هيكون شكلها



هنجيب حلة فيها شوية مية ونحط فيها البطاطس



ونسيبها تستوي نص سوا

ونصفيها من المية بتاعتها

دة شكلها




والغرض من اننا بنسلقها نص سلقة اننا بنتخلص من النشا اللي في البطاطس

وهتبقي احسن بكتير زي فكرة المكرونة كدة

هنجيب صنية يفضل تيفال عشان ما نحتجش نضيف زيت نهائي

لو مش متوفر هنجيب اي صنية وندهنها زيت زيتون بسيط اوي

انا جبت صنية تيفال وحطيت فيها البطاطس منغير زيت نهائي



وبالمرة نجيب البرجر الكمية اللي انت عايزاها ونحطه في نفس الصنية

وبرضه انا ما استخدمتش زيت نهائي كفاية الدهون اللي موجودة فيها



انا كنت عاملة كمية علي قدي

المهم دول شكلهم وهم متجمعين سوا



وندخلهم الفرن علي حرار عالية الي حد ما

وهنتابعهم من وقت للتاني ونقلبهم لحد ما يتحمروا كويس

دة هيكون شكلهم




ودة شكل البطاطس لوحدها
ودة شكل البطاطس لوحدها




زووووم اكتر



لونها ذهبي وجميلة جدا ولا طعمها يا بنات والله خطير جدا وتاكليها وانت مطمنة

المهم انا حطيت عليها رشة ملح وزعتر بموت فيها بالزعتر بيبقي طعمها رائع




وهنا شكل الاكلة بتاعتنا كلها