الحب من تاسع نظرة

[ayoun elkamr]

بعد ما الانسـان بيخلص تعليــم و يتخرج ويلاقي شغل .. مبيبقاش ناقصــه غير حاجتيــن .. اول حاجه انه يجـيـب بدلة عشان الفرح .. و تاني حاجـه انه يدور على عروسـة عشان الفرح برضــه .. وفي تمانيـن في الميـة من الحالات بيتجـه الانسـان الى أمــه .. وبعد ما بيخلص عشـا .. بيطلب منها انها تدورلـه على عروسـة .. و بـعد فترة من اسبوع الى شهر .. بيلبس البدلة و بيرووح عشــان يخطب .. وبيبدأ مشوار من تسـع نظرات

النظرة الأولى : بالنسـبة للعريــس بتبـدأ بعد ربع ساعـه من بدايـة الزيارة .. لما بتخش العروسـة وهي ماسكـة صنيـة السـيـفــن .. و ساعتها بيبقى العريس محشـور بين أبو العروسـة على يمينــه و أخــوها على شمالــه .. و نظرا لان المسـافـة بين ايد أبوها و قفـا العريـس مبتبقاش كبيــره اوي .. فبيضطر العريس انـه يحترم نفسـه .. ويبص بكل بـراءه على وش العروســة فقـط .. وياخدلـه كوبـاية سيفن

النظره الاولى بالنسـبة للعروسـة بتبقى مختلفـة شويـه : لانها بتبقى مقسمـه الى نصيــن .. النص الاول دا بيبقى وهو لسـه داخل البيت .. ودا طبعـا لان في كل بيت .. بيبقى فيـه مكان استراتيجي او اكتر .. بيقدروا البنات يشوفوا منـه اللي داخل ويتفحصوه من غير ما هو يشوفهــم .. اما بقى النص التاني من النظرة .. فبيبدأ وهي داخلـة شايـلة صنيـة السيفن .. ورغـم انها بـ تبقى نص نظرة .. الا انها بتقدر تلاحـظ من خلالها أثار تعويرة في ابهام ايده الشمال ..

النظـرة التانيــة :بعـد انتهاء الزيارة .. بينزل العريس وعيلتــه ويركبوا العربيـه .. - دا في حالـة لو كانوا جايين بعربيـة - .. و اول حاجـه بيعملها طبعــا انه يقلــع الجزمــة أم بوز .. اللي بتبقى فرتكت صباع رجلــه الصغير .. و اللي اختــه اصرت انه يلبســها رغم انها ضيقـه عليــه .. بعـد ما اقنعــته ان الجزمــة دي شئ مهـم جدا و ان العريس أساسا بيتعرف من جزمتــه .. و بتبدأ ساعتها النظرة التانيـة اللي هي نظرة بإستخـدام الودن .. بيسمـع فيهـا العريس رأي أمـه و ابوه و اختــه ..

ونفس الشئ بالنسبـة للعروســة .. بعد ما بتقلع الصندل ابو كعب .. اللي نجح انه يحولها من حنان ترك الى ياسميــن عبد العزيز .. و بعـد ما بيشربوا الباقي مـن ازازة السـيفن .. بتبدأ برضـه تسمـع رأي أبوها وأمها و اخواتها ..

و لو وافقوا على بعض والموضوع استمر .. بنخش في مرحلـة النظرة التالتــة ..

النظرة التالتـه : والنظرة دي بتبدأ بعـد مرور فترة .. وبعد ما العيلتين يتعرفوا على بعض اكتر .. ويعملوا خطوبــة رسمي .. والنظرة دي بتبقى نظرة بأعيـن الآخريــن .. يعنـي رأي خالتـه وعمتهــا .. وخالها وعمـه .. و اصحابهم و جيرانـهم .. والنظرة دي على اد ما هي بتعتبـر ثانويـة .. الا انها وبشكل غير مباشر بتبقى مؤثرة جدا .. و هي أصلا اللي بتحدد ما اذا كانت الخطوبـة هتستمر او لأ ..

لو الموضوع كمل بنبدأ نخش في مرحلة النظرة الرابعـة

النظرة الرابعــة : ودي النظرة اللي بيبدأ كل واحــد يشوف فيها عيــوب التانـي .. ودا بيبان من تصرفـات ومواقف بسيطـة جدا .. بتبقى تلقائـيـة ومش مقصودة .. يعني العروسـة بتلاقيـه فجأه قلها و هو بيكلمها عـ الموبايل - دا في حالـة لو كان بيكلمها ع الموبايل - : ( طب يلا انا هقفل بقى يا موحـا عشـان الدقيقة قربت تخلص ).. وبتبقى لحظـة صدمــة بتكتشف فيها موحا انـه جلـده وبخيل ومعفـن .. أو مثلا لو قاعدين بعد ما اتغدى عنــدهم .. وبيشربوا الشاي و بيتفرجوا ع التلفزيــون .. وبيقولها : امريكـا دي حاشرة نفسـها في كل حـاجة .. يعني هي هيلاري كيلينتـون مالها بـ مـيـة حوض النيل .. وبتبقى لحظـة صدمـة لما بيلمح في عينـها سؤال ( مين هيلاري كيلينتون دي ؟ ) .. و بيكتشف ساعتها ان ثقافتـها بتنحصر في روتانا سينيما وام بي سي اكشن والحياة مسلسلات ..
ولو العيـوب دي مش كبيرة ومش مؤثرة بيتـم التغاضي عنهــا .. وندخل في مرحلـة النظرة الخامسـة

النظرة الخامسـة : ودي النظرة اللي بيبدأوا يشوفوا فيهـا مميزات بعض .. وبرضـه بتبقى عن طريق مواقـف بسيطــة وحاجات صغيرة .. بتبدأ تحس انه راجل و شهم و ذكي و .. و ... وهو بيبدأ برضـه يحس انها محترمـة و ذكيـة و أهلها ناس طيبيـن .. و .. و ..

و بتستمر الحياة بامبـي جدا .. لحد ما نوصل للنظرة السادســة

النظـرة السـادسـة : دي نظرة مهمــة .. حيث ان تليفــون أنتيمـة العروسـة بيرن قبل المغرب بسـاعة كدا .. و بتبقى العروسـة بتتصل عليـها عشـان تحكلها عن مشكلـة فظيـعة جدا .. وان الأسرتيــن اختلفوا على نـوعيـة السيراميــك أو لون دهان الحيطــة أو قاعـة الفرح او الديب فريزر و حاجات من هذا القبيل .. وبتبقى الخـطوبـة على وشـك الانهيـار فعلا .. والمشكـلة ما بتبقاش في السيراميــك او الديب فريزر .. على اد ما المشكلـة بتبقى في ان كل عيلـة عايزة تمشي رأيهــا .. ومش من اولها بقى هيمشـوا علينـا رأيـهم .. و المواقف دي شر لا بـد منـه .. لان دي اللي بتبيـن قدرتـهم على التعامل مع المواضيــع دي .. ومدى مرونـة كل واحـد فيهـم .. وبتبين اذا ما كانوا فعلا باقيـين على بعض ... ولا الديب فريزر هيوقع بينهــم ؟ .. ولو ربنا كرم و تجاوزوا المرحلـة دي .. بننتقل الى مرحلة النظرة السابعـة

النظرة السابعــة : قبل الفرح بأسبــوع .. بيعمل فيها الاتنين فلاش باك لكل الحاجات اللي حصلت بينهـم .. من أول لقاء كوبـاية السيفن .. ولحـد الوقت دا .. وبيبقوا تقريبـا عرفـوا اهم عيـوب بعض و أهم مميـزات بعـض .. و ساعتها بينتقلـوا من مرحلـة التفكيــر و الملاحظـة إلى مرحلـة التقبل .. يعني كل واحـد بيبقى خلاص اتعــود على التاني وتقبلـه زي ما هو كدا بشخصيـته و أهله .. و مميزاتـه وعيوبـه وبكل ما فيــه .. ودا بيخلينـا ننتقل بعد كدا للنظرة التامنــة

النظرة التامنــة : ودي النظرة وهم قاعـدين في الكـوشـة .. بعد ما بيكتبوا الكتاب .. و هم بيأكًـلوا بعض الجاتــو .. في مشهـد بيستفز كل اللي قاعدين .. لسبب من تلاتـه : اما لان القاعدين لسـه متجوزوش .. او لانهـم اتجوزوا بس بقالهم خمس سنين مفطروش مع بعض حتى .. او لان التورتـة قربت تخلص وهم لسـه ماخدوش .. والنظرة دي بتبقى نظرة سعاده وفرح .. و كل واحـد بيحمـد ربنا انه اخيرا خلص و الموضوع تـم على خير .. و بيبقوا ساعتها فرحانين ومبسوطيـن و مبيفكروش في أي حاجـه خالص

النظرة التاسـعـة : و دي اول ما بيروحوا البيــت .. و بتبقى نظرة تقدير ووفاء للانسـان اللي خلاص هكمل معاه حياتي .. ورغم ان احنا في البدايـة ما اخترناش بعض .. وكان جواز صالونات .. اهالينـا فيه هم اللي اختاروا .. ورغم ان احنا فعلا منعرفش بعض غير من سنـه أو سنتيـن .. بس خلاص الانسـان دا بقى حياتي .. وبقى أقرب حـد ليــا وهكمل عمري معاه... وساعتها بتتحول النظره دي الى نظرة حب ... حب من تاسع نظرة

[♥ρėŧŧу ςαŧ♥]

موضوع جميل
تسلم ايدك يا حبيبتى