................تؤ تؤ تؤ
قول آه وللا قول لأ
وللا قول تؤ تؤ تؤ
هي عركة ف حارة
وللا ردح حريم بالبؤ
............................................تؤ تؤ تؤ
وللا شيخ في جامع
والكل قاعد سامع
قال اوعي تبقي صايع
هتاكلك نار لو قلت لأ
............................................تؤ تؤ تؤ
مش مهم يابني تقرا
خليها شروة ف زنقة
وبكرة هتبقي غرقه
والكل فيها راح يلؤ
............................................تؤ تؤ تؤ
وان كنت شغل بره
أو م السوق الحرة
افهم يامصري مرة
وقول للمايل لأ
...........................................تؤ تؤ تؤ
وبكرة هتاكلوا فطير
وتناموا علي الحرير
لحمة وشربة مواسير
بس اوعي تقوللي لأ
..........................................تؤ تؤ تؤ
اصحي ياعمي وقوم
صحصح مرة م النوم
بكره وبعده محروم
لو قلت آه او حتي لأ
.........................................تؤ تؤ تؤ
لا سكر وللا زيت
ها يعمرولك بيت
راح تلبس في الحيط
وتقول ياريتني قلت لأ
........................................تؤ تؤ تؤ
يامصري ياأبو الكرم
ياباني قلعة وهرم
اوعي م الجوع تتفرم
طول عمرك عارف الحق
.....................................تؤ تؤ تؤ
يامصري ده دستور
لا سكر وللا كستور
عيش ولو بتوب دمور
وقول مرة ف حياتك لأ