تخيل لو في واحد غتت و زنان و رغاي بايت معاك.. صاحي و فايق لك طول الليل .. وعاملك وش في دماغك .. وكل ما يفتح معاك موضوع ويدخل في موضوع ..

أكيد طبعا هتتخنق منه!


طيب لو قلنا لك أنه هيفضل معاك برضو طول النهار؟؟

ممكن تصبر عليه اليوم ده
يمكن يمشي اليوم اللي بعده!


طيب لو لقيته بقى شخصية لازقة..

كل ما تدخل حتة يدخل معاك

تنام لازق جنبك ..تاكل أيده في طبقك .. تخرج رجله على رجلك
تتكلم مع حد يستفزك ويسخنك عليه ... يتكلم برضو بيستفزك

أكيد زمان دمك مولع نااااااار
مخنوووووق
شيلوووه من قدااااااااامي


طيب لو قلنا لك أن الشخصية دي هتعيش معاك طول عمرك؟؟

ماتقولش هقتله!!
لأنه مش هيموت
و عنده قدرة أنه يطلع لك في أحلامك


إذن الحل لازم تعرف تتصرف معاه إزاى
عشان حياتك ما تبقاش نكد في نكد

ازاي أنت اللي تكيده و تغيظه و تخليه يبعد عنك
و لو قرب لك تاني .. يا ويله !

و بعون الله عندنا الحلول والوسائل.. مش اللي بس تغيظه
لكن هتحرقه كمان !



ايه رأيك أنك فعلا عايش مع الشخصية دي
لكن الغريـــــــب بعد كل اللي وصفناه أنك بتتعامل معاه ومتآلف عادي مع وجوده
يعني لزقته فيك بالشكل ده تحسسك أنه حبيبك "اللدود"
بيحبك فمش عايز يفارقك

لكن




شخصيتنا اللي كنا بنتكلم عليها هي:

الشيطان الرجيم

العدو الخفي المبين

خفي => لأنه شايفك وبيستعمل معاك كل أسلحته وعشان هو خفي فأسلحته كمان خفية

مبين => لأن عداوته لك ظاهرة وباينة
بيكرهك وبيحتقرك
عايز يضلك .. عايز يؤذيك
عايزك من الآخر تقول "كفرت بالله" عياذا بالله


بإذن الله هنتكلم بالتفصيل عن تدخلات الشيطان في حياتنا عشان نعرف ايه سبب وسوسته وايه المداخل اللي بيدخلنا منها

و اللي بسبب تقصيرنا في سد المداخل دي بقت وسوسته شديدة علينا .. وبتصل مع بعض الناس للأسف أن وسوستها تبقى ملازمة لها

وهنتكلم إن شاء الله عن أسلحته وإمكانياته و هنتكلم كمان عن الأسلحة اللي معانا بس مش بنستخدمها ..

وهنعرف في الآخر مين أقوى !!بداية قبل ما نتكلم على عدونا اللدود.. وعشان ما يختلطش علينا

محتاجين نعرف ..

ايه الفرق بين وسوسة الشيطان وبين وسوسة وتزيين النفس الأمّارة بالسوء؟

وهستعين في الإجابة على نقولات كتيرة


** من أول الفروق التي قالها الإمام ابن تيمية رحمه الله:

ما كَرِهَتْه نفسُك لنفسك .. فهو من الشيطان فاستعذ بالله منه،
وما أحبته نفسُك لنفسِك .. فهو من نفسك فانهها عنه.

يعني..
لو الوسوسة دي جت في حاجة نفسك بتكرهها .. يبقى منالشيطان لأن الشيطان عايز يغويك وخلاص.. عايز يكعبلك في أي ذنب

لكن
لو الوسوسة جت في حاجة أنت بتحبها .. يبقى من نفسك
لأن النفس مش بتتعلق إلا في الحاجة اللي بتشتهيها وبتحبها




** عشان تعرف الفرق بين الوسوستين :

إذا كان من يوسوس لك لا يهمه إلا أن تقع في المعصية..

بصرف النظر عن نوعها.. فلو فشل في جانب انتقل إلى جانب آخر، وهكذا لحد ما يوقع الإنسان في المعصية ـ والعياذ بالله ـفهذا هو الشيطان..

أما لو كان هناك إصرار على معصية معينة لا يتركها الإنسان إلا بصعوبة..

فذلك من نفسك


ونعرفها كده

إبليس دائما يأتي من الباب اللي يرى فيه الإيمان ضعيفًا..

فإذا وجد إنسانًا متشددًا في ناحية معينة
يأتي إليه من ناحية آخرى يكون فيها ضعيفًا..

فإذا كان الانسان مثلا.. مقيما للصلاة محافظا عليها
ويؤديها في أوقاتها..

جاءه إبليس من ناحية المال

فيوسوس له حتى لا يخرج الزكاة ويبخل

ويأكل أموال الناس بالباطل

ويوهمه بأن الطريقة دي تزيد ماله..

أو يجد بنت محترمة لا تكلم زمايلها الشباب في الجامعة

يجيئها الشيطان من ناحية الجمال

فيجعلها تتنزل في شكل حجابها بحجة أنها لا تسعى لاغراء الشباب بل لأسباب آخرى!


** من الفروق :

إذا كانت الوسوسة لا تضعف ، ولا تقل بذكر الله تعالى ، ولا تذهب عنك ، فهو من الهوى والنفس
وإن ضعفت وقلّت بذكر الله تعالى فهو من الشيطان.


** من الفروق:

إن الشيطان يجعل المسلم ينسى ما يريد أن يقوم به من عمل بصورة عامة
قال تعالى:
"قَالَ أَرَأَيْتَ إِذْ أَوَيْنَا إِلَى الصَّخْرَةِ فَإِنِّي نَسِيتُ الْحُوتَ وَمَا أَنْسَانِيهُ إِلَّا الشَّيْطَانُ أَنْ أَذْكُرَهُ ۚ وَاتَّخَذَ سَبِيلَهُ فِي الْبَحْرِ عَجَبًا" (63)الكهف
وساوس الشيطان تبدأ حال الطاعة أي بمجرد دخول المسلم في صلاته أو تلاوته للقرآن ..الخ
يبدأ الشيطان ببث الخواطر والوساوس حتى يشغله ذلك عن نسيان شرف الطاعة وغايتها السامية..
قال تعالى:
" إِنَّمَا يُرِيدُ الشَّيْطَانُ أَنْ يُوقِعَ بَيْنَكُمُ الْعَدَاوَةَ وَالْبَغْضَاءَ فِي الْخَمْرِ وَالْمَيْسِرِ وَيَصُدَّكُمْ عَنْ ذِكْرِ اللَّهِ وَعَنِ الصَّلَاةِ ۖ فَهَلْ أَنْتُمْ مُنْتَهُونَ"(91)المائدة

ولعل من أهم صفات معصية النفس إن الإنسان على علم بما يقوم به من ذنب ويعلم عواقب ذلك من خزي في الدنيا وعذاب في الآخرة ولكنه مُصِّر على معصيته (إلا من رحم ربك)



** المصيبة الكبرى.. لما تتحد النفس مع الشيطان!!
بأن الشيطان يزين للنفس أمرا فتصبح الوسوسة من كليهما.

ازاي؟

بخطوات معينة:

الأول الشيطان هيبدأ يخليك تفكر في عمل المعصية أو الذنب .
فلو أنت جاهدت وطردت الفكرة مباشرة واستعذت من الشيطان ..خلاص الشيطان هيتركك من الذنب ده بس مش هيسيبك
هيوسوس لك بعد كده بذنب تاني!

فأنت كده انتصرت على الشيطان في أول جولة

ولغاية دلوقتي مفيش دور للنفس الأمّارة بالسوء



طيب بفرض أن الشيطان هو اللي هزمك وقمت بعمل الذنب : ( ؟

هنا يأتي دور النفس الأمّارة بالسوء!
فتبدأ النفس الأمّارة بالسوء بعد ما فعلت الذنب تجعلك تحب الذنب وتحب تكرره وتعمله كل شوية وتزين لك حلاوته وتعميك عن مرارته..
وتبقى من المصرين والمداومين عليه .


عافانا الله وإياكم من شؤم الذنب
اللهم آت نفوسنا تقواها و زكها أنت خير من زكاها أنت وليها و مولاها

:: قصة عداوة الشيطان للإنسان ::

عداوة الشيطان عداوة أزلية منذ أن خلق الله عز وجل أبانا آدم عليه السلام وأمره بالسجود له فأبى واستكبر

وكرهه ده مش لآدم فقط .. بل الكره ممتد لذرية آدم من البشر

لما نتدبر أقسام الشيطان في القرآن وهو بيقسم وبيحلف بالأيمانات المغلظة أنه هيضل بني آدم ونقرأ الآيات اللي ربنا ذكرها على لسانه
نفهم أد ايه الكره والعداوة

فَدَلاَّهُمَا بِغُرُورٍ

إِن يَدْعُونَ مِن دُونِهِ إِلاَّ إِنَاثًا وَإِن يَدْعُونَ إِلاَّ شَيْطَانًا مَّرِيدًا 117لَّعَنَهُ اللّهُ وَقَالَ لَأَتَّخِذَنَّ مِنْ عِبَادِكَ نَصِيبًا مَّفْرُوضًا 118 وَلأُضِلَّنَّهُمْ وَلأُمَنِّيَنَّهُمْ وَلآمُرَنَّهُمْ فَلَيُبَتِّكُنَّ آذَانَ الأَنْعَامِ وَلآمُرَنَّهُمْ فَلَيُغَيِّرُنَّ خَلْقَ اللّهِ وَمَن يَتَّخِذِ الشَّيْطَانَ وَلِيًّا مِّن دُونِ اللّهِ فَقَدْ خَسِرَ خُسْرَانًا مُّبِينًا119 من سورة النساء

وَإِذْ قُلْنَا لِلْمَلآئِكَةِ اسْجُدُواْ لآدَمَ فَسَجَدُواْ إَلاَّ إِبْلِيسَ قَالَ أَأَسْجُدُ لِمَنْ خَلَقْتَ طِينًا 61 قَالَ أَرَأَيْتَكَ هَـذَا الَّذِي كَرَّمْتَ عَلَيَّ لَئِنْ أَخَّرْتَنِ إِلَى يَوْمِ الْقِيَامَةِ لأَحْتَنِكَنَّ ذُرِّيَّتَهُ إَلاَّ قَلِيلاً 62 من سورة الإسراء


الشيطان عايز منك ايه ؟

وبيعمل فيك ايه؟

1- عايزك تبقى بخيل فيمنعك من الصدقة بحجة أنك هتبقى فقير ويأمرك بالفحشاء
الشَّيۡطَانُ يَعِدُكُمُ الۡفَقۡرَ وَيَأۡمُرُكُم بِالۡفَحۡشَآءِ

2- عايزك تبقى خواف وجبان.. وهو مش بيخوف إلا أولياءه!
إِنَّمَا ذَلِكُمُ الشَّيۡطَانُ يُخَوِّفُ أَوۡلِيَاءهُ

3- عايز يضلك
وَيُرِيدُ الشَّيۡطَانُ أَن يُضِلَّهُمۡ ضَلاَلاً بَعِيدًا


4- عايزك تبقى عايش موهوم .. وأكبر وهم ممكن تعيشه أنك تبقى عايش وماشي في سكة غلط وأنت مش داري
يَعِدُهُمۡ وَيُمَنِّيهِمۡ وَمَا يَعِدُهُمُ الشَّيۡطَانُ إِلاَّ غُرُورًا

5-عايز يوقع بينك وبين كل اللي حواليك... وعايزك تبقى غافل ولا هي عن ذكر الله وعن الصلاة
إِنَّمَا يُرِيدُ الشَّيۡطَانُ أَن يُوقِعَ بَيۡنَكُمُ الۡعَدَاوَةَ وَالۡبَغۡضَآءَ فِى الۡخَمۡرِ وَالۡمَيۡسِرِ وَيَصُدَّكُمۡ عَن ذِكۡرِ اللّهِ وَعَنِ الصَّلاَةِ فَهَلۡ أَنتُم مُّنتَهُونَ

6- لأنه عايز يضلك فهيزين لك عملك ..مش هيقولك اعمل الذنب اللي هيوديك النار لكن هيحليه في عينيك
وَزَيَّنَ لَهُمُ الشَّيۡطَانُ مَا كَانُوا۟ يَعۡمَلُونَ

لما جاء لآدم عشان يوسوس له أكل الشجرة..ماقالوش كل الشجرة اللي هتعصي بها ربنا بل:
فَوَسۡوَسَ إِلَيۡهِ الشَّيۡطَانُ قَالَ يَا آدَمُ هَلۡ أَدُلُّكَ عَلَىٰ شَجَرَةِ الۡخُلۡدِ وَمُلۡكٍ َّلا يَبۡلَى

7- عايز ينسيك نفسك عشان تفضل تعمل ذنوب
وَإِمَّا يُنسِيَنَّكَ الشَّيۡطَانُ فَلاَ تَقۡعُدۡ بَعۡدَ الذِّكۡرَى مَعَ الۡقَوۡمِ الظَّالِمِينَ

8- عايز يكشف عوراتك
فَوَسۡوَسَ لَهُمَا الشَّيۡطَانُ لِيُبۡدِىَ لَهُمَا مَا وُورِىَ عَنۡهُمَا مِن سَوۡءَاتِهِمَا

9- بينزغ (بيوقع)بينك وبين اللي حواليك
وَقُل لِّعِبَادِى يَقُولُوا۟ الَّتِى هِىَ أَحۡسَنُ إِنَّ الشَّيۡطَانَ يَنزَغُ بَيۡنَهُمۡ

10-عايزك تسمع أغاني (لأنها صوت الشيطان) ..عايز يشاركك في المال وحتى في جماع زوجتك!

وَاسۡتَفۡزِزۡ مَنِ اسۡتَطَعۡتَ مِنۡهُمۡ بِصَوۡتِكَ وَأَجۡلِبۡ عَلَيۡهِم بِخَيۡلِكَ وَرَجِلِكَ وَشَارِكۡهُمۡ فِى الأَمۡوَالِ وَالأَوۡلادِ وَعِدۡهُمۡ وَمَا يَعِدُهُمُ الشَّيۡطَانُ إِلاَّ غُرُورًا

11- عايزك تحرق في عذاب السعير
إِنَّ الشَّيۡطَانَ لَكُمۡ عَدُوٌّ فَاتَّخِذُوهُ عَدُوًّا إِنَّمَا يَدۡعُو حِزۡبَهُ لِيَكُونُوا مِنۡ أَصۡحَابِ السَّعِيرِ

12- عايزك تبقى حزين لما يوقع بينك وبين أصحابك
إِنَّمَا النَّجۡوَى مِنَ الشَّيۡطَانِ لِيَحۡزُنَ الَّذِينَ آمَنُوا



ايه عاقبة اتباع الشيطان؟

1- الخسران المبين
وَمَن يَتَّخِذِ الشَّيۡطَانَ وَلِيًّا مِّن دُونِ اللّهِ فَقَدۡ خَسِرَ خُسۡرَانًا مُّبِينًا

2- الغواية والضلال
وَاتۡلُ عَلَيۡهِمۡ نَبَأَ الَّذِى آتَيۡنَاهُ آيَاتِنَا فَانسَلَخَ مِنۡهَا فَأَتۡبَعَهُ الشَّيۡطَانُ فَكَانَ مِنَ الۡغَاوِينَ

3- الخذلااااااان
وَكَانَ الشَّيۡطَانُ لِلۡإِنسَانِ خَذُولًا

ومن أمثلة خذلانه:
إِذۡ زَيَّنَ لَهُمُ الشَّيۡطَانُ أَعۡمَالَهُمۡ وَقَالَ لاَ غَالِبَ لَكُمُ الۡيَوۡمَ مِنَ النَّاسِ وَإِنِّى جَارٌ لَّكُمۡ فَلَمَّا تَرَاءتِ الۡفِئَتَانِ نَكَصَ عَلَىٰ عَقِبَيۡهِ وَقَالَ إِنِّى بَرِىٓءٌ مِّنكُمۡ إِنِّى أَرَى مَا لاَ تَرَوۡنَ إِنِّىَ أَخَافُ اللّهَ وَاللّهُ شَدِيدُ الۡعِقَابِ

مَّا أَنَا۟ بِمُصۡرِخِكُمۡ وَمَا أَنتُمۡ بِمُصۡرِخِىَّ

4- مع كترة اتباع خطواته وتزيينه هيبقى الإنسان وليه يوم القيامة ويتعذب معاه
فَزَيَّنَ لَهُمُ الشَّيۡطَانُ أَعۡمَالَهُمۡ فَهُوَ وَلِيُّهُمُ الۡيَوۡمَ وَلَهُمۡ عَذَابٌ أَلِيمٌ

5- فعل الفحشاء والمنكر
وَمَن يَتَّبِعۡ خُطُوَاتِ الشَّيۡطَانِ فَإِنَّهُ يَأۡمُرُ بِالۡفَحۡشَآءِ وَالۡمُنكَرِ

6- الصد عن سبيل الله وعدم الهداية
وَزَيَّنَ لَهُمُ الشَّيۡطَانُ أَعۡمَالَهُمۡ فَصَدَّهُمۡ عَنِ السَّبِيلِ فَهُمۡ َلا يَهۡتَدُونَ

ايه سبب وسوسة الشيطان؟؟

الشيطان مش بيوسوس إلا اللي بيفتح باب أو منفذ في قلبه عشان الشيطان يدخل منه
وهو بيوسوس وبيستهدف فقط أغلى حاجة عندك:
إيمانك اللي في قلبك

ولذلك تجد الأشياء التافهة لا يُلقي الشيطان في قلبك الشك فيها
يعني مثلا مدينة كبيرة زي القاهرة مدينة عمرانة و مليئة بالسكان
أكيد عمر ما خطر ببالك مرة تشك أن القاهرة دي بلد فاضية ومش عمرانة
لأن الشيطان مالوش مصلحة في تشكيكك في الحاجات دي

الشيطان طموحاته أكبر من كده!

الشيطان له غرض كبير في إفساد إيمان المؤمن

وبيجند ومش بيبخل بأي سلاح معاه عشان يطفئ نور الهداية في قلب المؤمن
ويوقعه في ظلمة الشك والحيرة
والنبي صلّ الله عليه وسلم بيَّن لنا الدواء الذي فيه الشفاء وهو قوله: "فليستعذ بالله ولينته"

==================


عايزين نشبه القلب بالحصن
والشيطان عدو عايز يدخل الحصن ويملكه ويستولي عليه

طيب اللي عايز يحفظ الحصن ده من العدو..
هيسيب أبوابه مخلعة... وشبابيكه مكسرة .. والحرس اللي على الباب سايبهم نايمين؟؟
أو هيبقى أصلا مش عارف أماكن الأبواب دي فين؟؟

طبعا لا

فلذلك لا يقدر على حفظ الحصن من العدو إلا بحراسة أبواب الحصن ومداخله

طب ايه هي مداخل الشيطان والأبواب اللي بيدخل منها على القلب؟؟
مداخل الشيطان وأبوابه .. ببساطة هي

صفات الإنسان

طبعا الصفات كتيرة بس هنركز على أهم الأبواب دي
واللي مش بتضيق حتى لو مليون شيطان دخلوا منها


من أبوابه العظيمة : الغضب والشهوة

فإن الغضب هو غول العقل ..يعني بيهلك العقل وبيذهب العقل مايخليش الإنسان يفكر
وإذا ضعف جند العقل .. هجم جند الشيطان
ولما يغضب الإنسان.. الشيطان بيلعب به زي ما يلعب الطفل بالكرة.

ومن أبوابه العظيمة الحسد والحرص :
فمهما كان العبد حريصـًا أعماه حرصه وأصمَّهُ
يعني لما الإنسان يكون قلبه فيه نور البصيرة هيعرف مداخل الشيطان عليه.. فإذا غطاه الحسد والحرص.. لم يبصر !
زي ما بنقول هيبقى أعمى البصر والبصيرة

وفي الوقت ده
هيلاقي الشيطان فرصة فهيحلي عند الحريص كل حاجة توصله إلى شهوته ، ولو كانت حاجة منكرًة فاحشـًة
وفي الحرص قال ـ صلّ الله عليه وسلم ـ :
((ما ذئبان جائعان أرسلا في غنم بأفسد لها من حرص المرء على المال والشرف لدينه)).
(رواه الترمذي وقال حسن صحيح ، ورواه أحمد ، والنسائي وصححه الألباني) .

يا الله!
يعني تخيل ذئبين جائعين تركتهم في قطيع غنم... شوف هيكون أد ايه افتراسه وشراسته وهو بينهش في الغنم
وده بقى مش هياكل بشكل طبيعي هياكل رجل خروف ومرة ياكل واحد من رقبته وواحد تاني اللي لحقه منه هياكله
فكذلك الحرص على المال والشرف لو دخل قلب الانسان هيفسد دينه زي الذئبين كده وأكتر!


ومن أبواب الشيطان العظيمة الشبع من الطعام :
حتى لو كان حلالاً صافيـًا !!
لأن الشبع يقوي الشهوات .. والشهوات أسلحة الشيطان .


ومن أبوابه العظيمة العجلة وترك التثبت في الأمور :

قال ـ صلّ الله عليه وسلم ـ :
((العجلة من الشيطان والتأني من الله تعالى)).
(رواه الترمذي بلفظ الأناة وقال حسن وحسنه الزرقاني والألباني).


ومن أبوابه العظيمة البخل وخوف الفقر :
لأن ده هو اللي بيمنع من الإنفاق والتصدق ويدعو إلى الادخار والكنز والعذاب الأليم .

ومن أبوابه العظيمة التعصب للمذاهب والأهواء والحقد على الخصوم والنظر إليهم بعين الازدراء والاحتقار :
ودي حاجة تهلك الإنسان الكويس العابد والإنسان الفاسق جميعـًا
لأن الطعن في الناس والاشتغال بذكر نقصهم صفة مخلوقة في الطبع من الصفات السبعية (صفات الشراسة..صفات الحيونات الوحشية زي الأسد) .


ومن أبوابه سوء الظن بالمسلمين :
قال الله تعالى :
(يَا أَيُّهَا الَّذِينَ آمَنُوا اجْتَنِبُوا كَثِيراً مِنَ الظَّنِّ إِنَّ بَعْضَ الظَّنِّ إِثْمٌ)(الحجرات/12)
والمؤمن يطلب المعاذير والمنافق يطلب العيوب .
كيف يوسوس الشيطان؟

"يُقال" أن الشيطان له شئ يشبه الخرطوم يضعه على قلب الانسان ويبث من خلاله وساوسه

إن إبليس له خرطوم كخرطوم الكلب واضعه على قلب ابن آدم ، يذكره بالشهوات واللذات ، ويأتيه بالأماني ، ويأتيه بالوسوسة على قلبه ليشككه في ربه ، فإذا قال العبد : أعوذ بالله السميع العليم من الشيطان الرجيم ، وأعوذ بالله أن يحضرون ، إن الله هو السميع العليم ، خنس الخرطوم عن القلب
الراوي: معاذ المحدث: الشوكاني - المصدر: رفع البأس عن حديث النفس - الصفحة أو الرقم: 40
خلاصة حكم المحدث: صحيح




والشيطان خبيث جدا

فقد يدلك الشيطان على 99 بابا للخير ويفتحهم لك بنفسه في سبيل أن يظفر منك بباب واحد قد يكون فيه هلاكك.




ما اسم الشيطان الذي يوسوس للانسان في صلاته ؟
خنزب
هل يجوز سب الشيطان؟
لا يجوز!
لحديث النبي صلّ الله عليه وسلم:
"لا تسبوا الشيطان ، وتعوذوا بالله من شره " صححه الالباني

فأمرنا بالتعوذ منه ونهانا عن سبه

والسبب:
عن أسامة الهذلي والد أبي المليح أن رسول الله صلى الله عليه وسلم قال:
" لا تقل تعس الشيطان ، فإنه يعظم حتى يصير مثل البيت و يقول : بقوتي صرعته ، و لكن قل باسم الله ، فإنك إذا قلت ذلكتصاغر حتى يصير مثل الذباب"
الراوي: المحدث: الألباني - المصدر: صحيح الجامع - الصفحة أو الرقم: 7401
خلاصة حكم المحدث: صحيح


يعني كونك بتشتمه معناها أنه فعلا قدر يكدرك وله تأثير عليك
فأنت اعمل بوصية النبي واذكر الله


ازاي الشيطان بيوسوس لنا 24 ساعة ؟
لأنه لا ينام
قيل للحسن البصري رحمه الله: أينامُ ابليس؟ فقال: لو نام لوجدنا راحة

ازاي الشيطان في رمضان بيوسوس وهو مصفد (متسلسل)؟

إن التصفيد لا يمنع الأذى من الشيطان كما قال شيخ الإسلام ابن تيمية رحمه الله: "فضعفت قوتهم وعملهم بتصفيدهم فلم يستطيعوا أن يفعلوا في شهر رمضان ما كانوا يفعلونه في غيره ولم يقل أنهم قتلوا ولا ماتوا بل قال: صفدت والمصفد من الشياطين قد يؤذي"

رجل كان يكلم الجن, فقالوا له:

ليس علينا أشدُّ ممّن يتبّعُ السنة, وأما أصحاب الأهواء فانا نلعبُ بهم لعباً.

سبحان الله !
اتباع السنة حصن من أذى الشياطين لأن غاية الشيطان أنك تترك وتتفلت من السنة لأن متبع السنة عنده رسوخ وطمأنينة لكن متبع الهوى تتلاعب به اهواءه فبيسهل للشيطان دخول القلب من المنفذ ده

((اعرف عدوك))
معلومات عن الشيطان

والمعلومات دي مش مذكورة للتسلية أو من باب العلم بالشئ
لكن
عشان نتجنب فعلها حتى لا نشابه الشيطان في فعل من أفعاله و كي لا نجعل للشيطان نصيبا من يومنا وأفعالنا


* كيف يأكل الشيطان ويشرب ؟

قال رسول الله : ( صلّ الله عليه وسلم )

"إن الشيطان يأكل بشماله ويشرب بشماله " رواه مسلم

*متى يضحك الشيطان ؟

قال رسول الله صلّ الله عليه وسلم )

"إذا تثاءب أحدكم فليرده ما استطاع فإن أحدكم إذا قال : ها ، ضحك منه الشيطان " رواه البخاري



*متى يبيت الشيطان في البيت ؟


قال رسول الله صلّ الله عليه وسلم )

"إذا دخل أحدكم بيته ولم يذكر اسم الله عند دخوله قال الشيطان : أدركتم المبيت " رواه مسلم

*ما هو عمل الشيطان ؟

قال رسول الله صلّ الله عليه وسلم )

" إن إبليس يضع عرشه على البحر ثم يبعث سراياه فأدناه منه منزلة أعظمهم فتنة
يجيء أحدهم فيقول : ما تركته حتى فرقت بينه وبين امرأته قال : فيدنيه منه ويقول : نعم أنت "
رواه مسلم
* ما مفتاح عمل الشيطان ؟

قال رسول الله صلّ الله عليه وسلم )

"إذا أصابك شيء فلا تقل : لو اني فعلت كذا وكذا لكان كذا وكذا ، ولكن
قل : قدر الله وما شاء فعل ، فإن لو تفتح عمل الشيطان " رواه مسلم


* متى يبكي الشيطان ؟

قال رسول الله صلّ الله عليه وسلم )

" إذا قرأ ابن آدم السجدة فسجد اعتزل الشيطان يبكي يقول : يا ويلي امر ابن آدم بالسجود فسجد فله الجنةوأمرت بالسجود فأبيت فلي النار " رواه مسلم


*متى يتصاغر الشيطان ؟

قال رسول الله صلّ الله عليه وسلم )

" إذا تعست دابة أحدكم فلا يقل : تعس الشيطان فإنه إذا قال ذلك تعاظم الشيطان حتى يكون مثل البيت ، ولكن قل بسم الله ، فإنك إذا قلت ذلك تصاغر حتى يكون مثل الذباب "
رواه ابو داود


*متى يهرب الشيطان ؟

قال رسول الله : صلّ الله عليه وسلم

" إن الشيطان إذا سمع النداء بالصلاة ذهب حتى يكون مكان الروحاء " رواه مسلم


*متى يبول الشيطان ؟

قال رسول الله صل الله عليه وسلم )

في رجل نام حتى أصبح : " ذاك رجل بال الشيطان في أذنيه "متفق عليه

* كيف يمشي الشيطان ؟

نهى رسول الله صل الله عليه وسلم )

أن يمشي الرجل في نعل واحدة ، وقال " إنها مشية الشيطان "صححه الألباني



* أين يجلس الشيطان ؟

نهى رسول الله صل الله عليه وسلم )

أن يجلس بين الظل والشمس وقال " إنه مجلس الشيطان " رواه أحمد ازاي تتعامل مع الشيطان؟

ده بيعتمد على "نوعية" الشيطان

زي ما انتو عارفين الشيطان نوعين:
شيطان إنس ... و شيطان جن



تفتكروا مين أصعب في التعامل معاه؟؟
أكيد غالب اللي هيجاوب هيقول شيطان الجن أصعب..
لأننا مش شايفينه و لأنه فظيـــــع و زنان وبيؤثر علينا بشكل غريــــــــــب

لكن تعرفوا بقى سبحان الله ..
العكس هو الصحيح!

شيطان الجن أسهل بكتيير في التعامل معاه من شيطان الإنس
لـ 3 أسباب:


* النقطة الأولى:
ربنا سبحانه و تعالى قال:
" .. إِنَّ كَيۡدَ الشَّيۡطَانِ كَانَ ضَعِيفًا "

الشيطان اللي مجننا ده.. ربنا قال إن كيده ضعيــف

فكوننا نتأكد من المعنى ده ويكون عندنا يقين في كلام ربنا ده هيجعلنا أكثر قوة في تعاملنا معاه
*النقطة التانية:
اللي تؤكد ضعف الشيطان أنه بيخنس وبيضعف و يتصاغر ويتحرق بمجرد ذكر الله و الاستعاذة بالله

يعني مجرد ما لسانك بينطق
(أعوذ بالله من الشيطان الرجيم)
الشيطان بيتحرق

قال رسول الله صلّ الله عليه وسلم:
"الشيطان جاثم على قلب ابن آدم ؛ فإذا ذكر الله خنس وإذا غفل وسوس"
الراوي: عبدالله بن عباس المحدث: الألباني - المصدر: تخريج مشكاة المصابيح - الصفحة أو الرقم: 2221
خلاصة حكم المحدث: إسناده صحيح

الخلاصة :
كيد الشيطان ضعيف قدام أسلحة المؤمن اليقظ
اللي هنعرفها بالتفصيل إن شاء الله
لكن كل ما يكون الإنسان غافل.. الشيطان بيرجع يوسوس تاني وبتقوى وساوسه على قدر غفلة الانسان ده



*النقطة التالتة:
أن الشيطان مش بيؤثر ولا له سلطان على كل الناس



الشيطان بيؤثر على مين؟


ربنا سبحانه وتعالى قال:

لِيَجۡعَلَ مَا يُلۡقِى الشَّيۡطَانُ فِتۡنَةً لِّلَّذِينَ فِى قُلُوبِهِم مَّرَضٌ وَالۡقَاسِيَةِ قُلُوبُهُمۡ


إِنَّمَا ذَلِكُمُ الشَّيۡطَانُ يُخَوِّفُ أَوۡلِيَاءهُ فَلاَ تَخَافُوهُمۡ وَخَافُونِ إِن كُنتُم مُّؤۡمِنِينَ


كل اللي بيعمله أنه بيدعو للمعصية لكن مش بيجبر الإنسان على عملها

وَقَالَ الشَّيۡطَانُ لَمَّا قُضِىَ الأَمۡرُ إِنَّ اللّهَ وَعَدَكُمۡ وَعۡدَ الۡحَقِّ وَوَعَدتُّكُمۡ فَأَخۡلَفۡتُكُمۡ وَمَا كَانَ لِىَ عَلَيۡكُم مِّن سُلۡطَانٍ إِلاَّ أَن دَعَوۡتُكُمۡ فَاسۡتَجَبۡتُمۡ لِى فَلاَ تَلُومُونِى وَلُومُوا۟ أَنفُسَكُم مَّا أَنَا۟ بِمُصۡرِخِكُمۡ وَمَا أَنتُمۡ بِمُصۡرِخِىَّ إِنِّى كَفَرۡتُ بِمَآ أَشۡرَكۡتُمُونِ مِن قَبۡلُ إِنَّ الظَّالِمِينَ لَهُمۡ عَذَابٌ أَلِيمٌ


يعني بيقول أنا أجبرتكوش ولا ضربتكو على ايديكم عشان تعملوا الذنوب

أنا مجرد بس دعوتكم .. شاورت لكم بس بصباعي

فاستجبتم لي!!



لكن سلطانه على اللي بيتبعوه من الغاوين

إِنَّ عِبَادِى لَيۡسَ لَكَ عَلَيۡهِمۡ سُلۡطَانٌ إِلاَّ مَنِ اتَّبَعَكَ مِنَ الۡغَاوِينَ


وكمان اللي بيشك في الآخرة

وَمَا كَانَ لَهُ عَلَيۡهِم مِّن سُلۡطَانٍ إِلَّا لِنَعۡلَمَ مَن يُؤۡمِنُ بِالۡآخِرَةِ مِمَّنۡ هُوَ مِنۡهَا فِى شَكٍّ وَرَبُّكَ عَلَىٰ كُلِّ شَىۡءٍ حَفِيظٌ



فتعاملنا مع شيطان الجن سهل ويسير جدا ... فقط بالاستعاذة بالله من شره مباشرة
لأنا بنستعين بمن بيده ملكوت السماوات والأرض

عن سليمان بن صرد..
استب رجلان عند النبي صلى الله عليه وسلم ونحن عنده جلوس ، وأحدهما يسب صاحبه ، مغضبا قد احمر وجهه ، فقال النبي صلى الله عليه وسلم : ( إني لأعلم كلمة ، لو قالها لذهب عنه ما يجد ، لو قال : أعوذ بالله من الشيطان الرجيم ) . فقالوا للرجل : ألا تسمع ما يقول النبي صلى الله عليه وسلم ؟ قال : إني لست بمجنون . صحيح البخاري


المشكلة أننا فاكرين أن كلمة "أعوذ بالله" كلمة بتتقال وخلاص مش مدركين أن لها تأثير !

عبارة أعوذ بالله معناها : ألتجئ إلى الله وأحتمي بالله

تخيل وأنت بتستعيذ كأنك بتجري من حاجة خايف منها ولاقيت باب ربنا مفتوح تلجأ له وتحتمي به عشان ينتشلك من الحاجة اللي بتخوفك دي



بالنسبة لشيطان الإنس
ده بقى واحد من الناس ... بيمشي بين الناس
بس قلبه مش زي كل الناس !!
قلبه ده قلب شيطان .. مش بيدعو إلا للشر
قال رسول الله صل الله عليه وسلم:
( يكون بعدي أئمة لا يهتدون بهداي ، ولا يستنون بسنتي . وسيقوم فيهم رجال قلوبهم قلوب الشياطين في جثمان إنس )
صحيح مسلم




طب ازاي نعرف شيطان الإنس وازاي نتعامل معاه؟
زي ما قلنا أن شيطان الإنس أصعب من شيطان الجن
بل في بعض الأحيان تفوق وسوسة شياطين الإنس.. وبتكون أشد من وسوسة الشياطين
من أمثلة شياطين الإنس:
صاحب السوء الذي يتدسس بالشر إلى قلب رفيقه وعقله من حيث لا يحتسب ومن حيث لا يحترس , لأنه الرفيق المأمون !

وحاشية الشر التي توسوس لكل ذي سلطان حتى تتركه طاغية جبارا مفسدا في الأرض , مهلكا للحرث والنسل !

والنمام الواشي الذي يزين الكلام ويزحلقه , حتى يبدو كأنه الحق الصراح الذي لا مرية فيه .

وبائع الشهوات الذي يتدسس من منافذ الغريزة في إغراء.. لا تدفعه إلا يقظة القلب وعون الله .

وعشرات من الموسوسين الخناسين الذين ينصبون الأحابيل ويخفونها , ويدخلون بها من منافذ القلوب الخفية التي يعرفونها أو يتحسسونها . . وهم شر من الجنة وأخفى منهم دبيبا !
والإنسان عاجز عن دفع الوسوسة الخفية . ومن ثم يدله الله على عدته وجنته وسلاحه في المعركة الرهيبة !
الظلال


أما التعامل معاه
فربنا سبحانه وتعالى قال:

وَجَعَلْنَا بَعْضَكُمْ لِبَعْضٍ فِتْنَةً أَتَصْبِرُونَ

لم يأمرنا أننا نرد شره بشر... ولا نكيده ولا نعاديه
لكن الصبر والتعامل بالحسنى

ادۡفَعۡ بِالَّتِى هِىَ أَحۡسَنُ فَإِذَا الَّذِى بَيۡنَكَ وَبَيۡنَهُ عَدَاوَةٌ كَأَنَّهُ وَلِىٌّ حَمِيمٌ